CARACAS- Segun “El Nacional”, ku ta un korant na Venezuela, den un relato publiká djasabra último, ku na Kòrsou e migrantenan venezolano ta keda den mesun Sentro di Detenshon ku e otro prezunan komun. 

E relato ta indiká ku ta e organisashon no gubernental Human Rights Defense Curaçao, ta kende a denunsiá ku e outoridatnan di Willemstad ta sera e venezolano indokumentá na Sentro di Detenshon di e isla huntu ku e prezunan komun, loke ku ta violá e Kombenio Oropeo di Derechinan Humano.

Segun a keda indiká, e echo ku bo ta detené ku supuesto delinkuentenan, inkluyendo personanan sospechoso di delitunan grave, ta generá problemanan di salú pa e migrantenan ku ya ta troumatisá. Esaki ta keda ekspresá den miedu i deskonfiansa, problemanan sikológiko i e sensashon di ta keda tratá inhustamente manera delinkuente.

E organisashon no gubernamental ta agregá, ku debí na e miedu aki i spesialmente e preshon sikológiko, vários migrante ku ta konta ku medidanan di protekshon, ta kasi renunsiá na nan derechinan. A indiká ku ya nan no por soportá nan permanensia den SDKK i inkluso ta preferá di regresá bèk Venezuela, di unda nan a hui pa miedu i trato inhumano di parti outoridatnan.

Segun a keda indiká, e kondishonnan den e sentronan di e inmigrantenan, ku ya ta insostenibel, a keda deteriorá ainda mas. E migrantenan ta será den sèl ku delinkuentenan i no tin sufisiente personal kalifiká pa vigilá e refugiadonan.