WILLEMSTAD,—-Ayera tabata nèt dos siman pasá ku e aktividat di “Tumba Revival Festival 2021”, a tuma lugá den Curaçao Festival Center, kaminda ku Orkesta a kompaña un total di 26 Tumbero.

Ya tin algun dia kaba ku diferente músiko ta yama Vigilante Farándula i asina puntra ki dia nan ta haña nan pago, paso esaki te ku riba e dia di ayera no a tuma lugá. Di informashon risibí ta bisa ku, pa loke ta trata e parti di pago, esaki no tabata den man di A.M.A.K. pero esaki ta 100% den man di Sektor di Kultura di Kòrsou.

Vigilante Farándula a drenta den kontakto ku presidente di A.M.A.K. señor Manfred “Feko” Gomes, i a pone na altura di e yamadanan ku a drenta di diferente músiko i esaki nan tur a bisa ku te ku riba e dia di ayera nan no a risibí nan pago di e presentashon ku nan tabatin djabièrnè dia 12 di febrüari tras di lomba. T’asina ku “Feko Gomes” a duna di konosé ku.

“Pa loke ta trata e parti di pago, esaki ta den man di Sektor di Kultura, i e músikonan ta na altura di esaki tambe, por sierto mi mes a tuma kontakto ku Sektor di Kultura, kaminda ku mi  a pone nan na altura ku ya tin dos siman ku evento ta tras di lomba i músikonan ke sa kon ta para ku nan pago, ainda mi no a risibí kontesta di parti di Sektor di Kultura, si e parti di pago tabata den man di A.M.A.K. keremi ku e músikonan lo a keda kla kaba ku nan sèn. Mi ta spera ku pa e siman ku ta bai drenta aki, tur e músikonan keda kla ku loke a keda akordá na nan”.