Back to Top
Responsive image
E korant di pueblo

Sektor komersial ta rogando pa rònt adishonal di moratorio


April 7, 2021 • 2 minüt pa lesa

Direktor CBCS: direktor presidente di CBCS, Richard Doornbosch. Banko Sentral ta esun kende por outorisá moratorio serka bankonan.

Punda—Sektor komersial den tur rango ta bogando pa un rònt mas di moratorio. E di dos lockdown ku gobièrnu a anunsiá mas oumento den medidanan restringí di mobilidat ta kousando e daño nesesario i bahada den benta komersial na Kòrsou. Na 2020, Institutonan bankario a anunsiá un moratorio di 2x 3 luna. E biaha aki, nada ainda.

Asosashon di Restorant na Kòrsou, tabata e promé sektor ku e biaha aki a sali yora. Den un komunikado nan a mustra nan prekupashon ku no tin sufisiente benta i mas ainda si gobièrnu limitá nan entrega domisilario so. E doñonan di restorant ta prekupá di no por kumpli ku nan debernan na provedornan ni tampoko na empleado i bankonan fiadó.

Na 2020, pa redusí e impakto finansiero direkto di e krísis di Corona vírùs riba empresa i konsumidó individual, na mart , Centrale Bank van Curaçao en Sint Maarten (CBCS) a duna pèrmit pa e bankonan komersial ofresé nan klientenan moratorio di pago pa un periodo di tres pa seis luna. Esei a nifiká ku e bankonan por a duna nan klientenan dispensashon di pago di tantu kapital komo interes riba nan fiansa durante un periodo determiná, sin ku esei afektá posishon finansiero di e banko en kuestion. Ademas, a permití e bankonan oumentá temporalmente e montante máksimo ku por fia un persona na proporshon di su entrada (e debt-service ratio).

Sin embargo, e konseshon akí na e klientenan ta presentá sierto riesgo pa e bankonan komersial mes, pa nan posishon finansiero den futuro i, komo tal, pa stabilidat finansiero. Pa e motibu akí, CBCS no ta permití mas pa e bankonan sigui otorgá moratorio na un manera genériko, sin ku esei afektá e provishonnan ku e banko en kuestion mester tin. Pa novèmber a para e moratorionan.

No opstante, e bankonan por sigui evaluá, pa kada kaso individual i konforme e reglanan di maneho vigente, kon nan por sostené nan klientenan ku ta enfrentando difikultat finansiero, sin ku nesesariamente esei mester afektá e provishonnan ku e banko en kuestion mester tin. Ademas, CBCS a determiná ku no ta permití mas pa e bankonan komersial duna krédito ku ta surpasá e debt-service ratio total di 37 porshento. Di e manera akí, CBCS ke prevení dunamentu di krédito eksesivo na konsumidó i garantisá ku dunamentu di krédito na Kòrsou i Sint Maarten ta tuma lugá na un manera prudente.

Entretantu na mart un biaha mas a bini un “lockdown” komersial i gobièrnu a restringí kompania di habri i konsumidónan di kumpra debí na “Toke de Keda” i Plachi di Number”. Ámbos desishon lo afektá komersio durante luna 2021 kompletamente. Hopi kompania lo konfrontá problema pa paga nan kota di fiansa na bankonan komersial.

Login