WILLEMSTAD—E selekshon nashonal di futbòl for di British Virgin Islands, ku tin solamente 2 ekipo nashonal nan tras, riba e ranking di FIFA, ya ta na Kòrsou. Esaki for di na inisio di e fin di siman ku ta tras di lomba, unda ku ya nan ta hibando nan sekshonnan di práktika i preparashonnan riba tereno di FFK, pa nan weganan klasifikatorio pa mundial, bálido pa Grupo C.

Nan lo hunga nan promé wega djasabra awó 6’or, komo ekipo di kas den Stadion Ergilio Hato, enfrentando e ekipo di Guatemala, pa seguidamente djamars otro siman topa ku St. Vincent & the Grenadines, tambe den Stadion Ergilio Hato, pa 6’or di atardi, komo ekipo bishitante, unda St. Vincent lo ta ekipo di kas.

Esaki despues ku hustamente e 2 últimonan aki, a opta pa hunga nan weganan di kas na Kòrsou i lo hunga tambe tur nan 2 weganan di e siman aki, riba nos isla.

Miéntras tantu den kuadro di e preparashonnan di e ekipo nashonal di British Virgin Islands, dirigí pa tékniko Dan Neville, ta e intenshon pa nan kustumá ku e klima, unda inkluso ta e intenshon pa enfrenta un òf dos ekipo di futbòl riba nos isla, den wega(nan) amistoso di preparashon.

E ekipo ta konta ku e siguiente futbolistanan: Phillip Jules, Daniel Gilford, William Butler, Kristian Javier, Giovanni Grant, Miguel Marshall, Jerry Wiltshire, T’Sharne Gallimore, Jamie Wilson, Joshua Bertie, Carlos Septus, Robbie Green, Tyler Forbes, Justin Smith, Luka Chalwell, Luca Reich, Liam Blok, Kevin Fisher-Daniel, Ikyjah Williams, Jahmal Prentice i tambe Charles Medway.