Palu Blanku,– Personal di Selikor ku a limpia e área di Palu Blanku a indiká ku nan ta satisfecho ku e ruta di karnaval a keda basta limpi despues di e marchanan ku a keda organisá.

E tim di Selikor ku a limpia despues di Marcha di Mucha a kuminsá nan trabou alrededor di 7 or di anochi despues ku Marcha di Mucha a kuminsá na rotònde di Palu Blanku. Despues di un reunion pa kordiná e trabounan a ser indiká ku nan lo limpia te na St Helena. I na St Helena otro koleganan lo sigui ku e trabou.

Promé ku e trabounan di limpiesa a kuminsá algun personal na e sitio a indiká ku nan a nota ku mayoria shushi ta nèchi butá kantu di kaya pa personal di Selikor. Mayoria kùp di plèstik, tayó di plèstik i otro shushi a keda nèchi tirá afo indikando ku e trabou pa e personal lo tabata ménos den e oranan di anochi.

Na e sitio tambe por a nota di un organisashon total den e karavana di Selikor. E karavana ta kuminsá ku un pikòp dilanti pa blòkia tráfiko, siguí pa personal ku ta bari. Despues di e personanan ku ta bari tin un trùk di shushi primario ku ta rùim mayoria di e shushi. I por último tin un segundo trùk di shushi ku ta wanta e tráfiko di patras i alabes fungi komo “back-up” akaso e trùk di shushi primario yena ku shushi.

Tambe diferente personal di Selikor a indiká ku hopi hende sintá kantu di ruta di karnaval ta konsiderá limpiesa di Selikor komo e último grupo di nos Gran Karnaval 2023.