Abogado General Gerbrant Snijders.

WILLEMSTAD – Sí Korte Supremo sigui e konseho di Abogado General (AG) Gerbrant Snijders, esaki lo ta un desishon históriko ku lo tin konsekuensia grandi pa Kòrsou i Aruba i posiblemente pa otro paisnan di Reino Hulandes. Un desishon positivo na fin di mei akí lo hasi matrimonio entre personanan di mesun sekso posibel, i lo krea un presedente pa kasonan futuro tokante derechonan fundamental den Reino Hulandes.

E prosedura hurídiko a kuminsá na 2020 ora ku HRC i un pareha muhé a entamá un kaso pa deklará ku e limitashon di matrimonio te na un union entre un hòmber i un muhé ta nulo i ku mester permití matrimonio entre personanan di mesun sekso. E pareha, ku tin un relashon largo di amor, ke kasa na Kòrsou, pero nan a topa ku limitashonnan legal i a sigui lucha te nan haña un sentensia históriko di Hof. Hof a indiká den su sentensia ku e limitashon di matrimonio te na un union entre un hòmber i un muhé ta kontra e prohibishon di diskriminashon den “Staatsregeling” di Kòrsou i Aruba. Hof ta konsiderá ku e huesnan tin e deber konstitushonal pa yena e buraku den lei i duna e órden pa habri e oportunidat di matrimonio pa personanan di mesun sekso.

Snijders a konkluí ku e desishon di Hof ta korekto. El a enfatisá durante tratamentu dje tema akí den Korte Supremo, ku apesar dje preferensia p’e legisladó atendé e problema, ta trata di un diskriminashon serio basá riba orientashon seksual, komparabel ku diskriminashon riba base di sekso, rasa i religion. El a suprayá ku e buraku den lei ta eksistí hopi tempu kaba i ku e legisladó no tin plan pa solushon’é. E AG ta bai den fondo di e argumentonan di Hof i ta konkluí ku e huesnan no tabatin otro opshon ku intervení, mirando e deber konstitushonal i e karakter serio di diskriminashon. Snijders ta remarká ku artíkulo 1:30 di Kódigo Sivil Kòrsou, no ta den konformidat ku e derechonan i libertatnan fundamental den nos “Staatsregeling” (Areglo di Estado).

Ta importante pa remarká ku apesar di un desishon positivo di Korte Supremo pa e komunidat di LGBTQIA (lesbian, gay, bisexual, transgender, queer, intersex, asexual), e paisnan lo mester tuma pasonan pa adaptá legislashon di bèrdat tambe. E desaroyonan rondó di matrimonio di mesun sekso na Kòrsou ta yegando un momentu krusial ku e konklushon di AG Snijders na Korte Supremo. Ainda mester warda pa sa si Korte Supremo lo konfirmá e desishon históriko. Kasi sigur e huesnan di hulanda akí lo saka nan “arrest” (desishon) denter di algun siman.