WILLEMSTAD,—- Awe nochi 7 or di anochi, e promé episodio di e Reportahe Dokumental di Historia di Festival di Tumba, ta kuminsá riba e Facebook di Korant Vigilante.
E Dokumental ta bai pasa dos bes pa siman, awe nochi lo bai tin esun promé i djasabra esun di dos i asina sigui bai te na momentu ku yega episodio number 20. Pa loke ta trata e promé episodio, lo bo bai tei komo e promé invitado Farley Lourens, esaki sigur lo bai bira hopi interesante, paso Farley sigur tin masha hopi kos di papia riba dje durante di su karera den Festival di Tumba, hopi kos ta bin dilanti ku hopi hende no sa di dje.
Pa ku esaki Vigilante Farándula a drenta den kontakto ku e tres biaha Rei di Tumba, anto pa kolmo esun ku tin e rekòrt riba su nòmber komo gana festival di Tumba tres biaha konsekutivo. Esaki ta loke ku Farley a duna di konosé na Vigilante Farándula,”Na promé lugá mi ta sintimi hopi onra, na di dos ku a skohe mi persona pa e promé episodio di e Reportahe di Historia di Festival di Tumba. E trabou pa traha asina intensivo pa realisá un seri amplio di entrevista ku Reinan i Reinanan di Tumba ta unu di aploudí. Dokumentashon sin mas ta algu hopi importante pa hasi. Festival di Tumba, siendo e evento musikal mas grandi den nos kalènder di aktividat i Karnaval e ekspreshon kultural mas grandi di nos pais meresé ser dokumentá for di mas ángulo posibel. Mi a apresiá masha hopi ku a entrevistá mi persona i skohe e entrevista ku a hasi ku mi pa traha e promé edishon di un seri di programa den kua ta tira lus riba nos Tumba, nos artistanan, nos Festival Farándula i Karnaval. Alsando nos kultura, nos ta alsa nos nashon. Nos idioma Papiamentu i kreashonnan na Papiamentu den ritmo di Tumba ta duna nos Karnaval un identidat propio. Vigilante Media Group, sin mas a aportá en grande pa pone nos kultura i historia riba un pedestal duradero. Masha danki i sigui ku e bon trabou.