Pabien: minister Hato, dunando miembronan di Hustisia Seguridat i Abo felisitashon.

Punda—Minister di Hustisia, Shalton Hato ta kontentu ku e reakshonnan riba e seri di podcast organisá pa e fundashon “Hustisia Seguridat i Abo”. Ta trata di un seri di podcast riba e diferente funshon, tarea i rol di Ministerio di Hustisia.

“Tremendo”, tabata e reakshon di minister na momento a puntr’é riba e podcastnan ku alabes ta riba radio tambe. Hustisia Seguridat i Abo (HSA) a inisiá 3 sèptèmber 2015 na radio Direct 107.1FM ku un programa “live” tur siman. Tur siman HSA ta risibí invitadonan riba temanan ku tin di haber ku Hustisia. Hustisia tin temanan ku ta kore den e otro ministerionan òf organisashonnan i asina nos ta invitá esakinan pa tambe tei i konta mas tokante e tema. E oyentenan no tabata keda afó i nan por yama i hasi nan pregunta.

Mirando e modernisashon di nos medionan sosial i e diferente plataformanan ku a bini aserka e tim di redakshon a deliberá hopi riba kon nos por yega mas serka di e pueblo i en partikular nos hubentut. Asina a yega na e “rebranding” di Hustisia Seguridat i Abo kaminda awor a añadí tambe un podcast aserka. Pues esaki lo bai ta un kombinashon di podcast i programa “live” na radio pero tambe di reels, stories, snippets riba nan medionan sosial. Por skucha i mira e podcastnan  riba tur plataformanan sosial manera youtube, facebook i Instragram. Hustisia i Seguridat mas serka di Abo.