Back to Top
Vigilante banner image

Si drecha struktura di transporte públiko mas hende lo us’é outomátikamente


May 28, 2024 • 2 minüt pa lesa

ABC Busbedrijf ta tratando na haña 15 konvoi mas pa asina reforsá nan flota di konvoi.

Buena Vista,– Siman pasá redakshon di Vigilante a sinta huntu ku direktor di ABC Busbedrijf, John Cijntje, pa asina risibí informashon tokante ki direkshon e kompania di transporte públiko ta bai.

Aktualmente e kompania ta en espera di risibí 5 konvoi pa yuda akapará a preshon ku e flota aktual mester kumpli kun’é. Segun Cijntje, na e momentunan aki ABC Busbedrijf no tin sufisiente konvoi den reserva pa mantené e “dienstregeling” akaso mas ku 1 konvoi kai afó. Den práktika un kompania di transportashon, semper mester di tin un flota den reserva kaminda si akaso un konvoi daña riba ruta, un otro konvoi ta sali for di e ofisina prinsipal i sigui ku e ruta normal.

ABC Busbedrijf den promé instante a pidi pa renobá nan flota di konvoi ku 15 konvoi, pero mesora Cijntje a indiká ku nan organisashon ta satisfecho ku sikiera 5 konvoi lo yega e aña aki. Banda di e 15 konvoinan e kompania estatal ta pidiendo un supsidio adishonal di 1.5 mion florin, ku lo yuda drecha e servisio di e kompania konsiderablemente.

Na momentu ku e konvoinan drenta i e supsidio subi, e kompania por kuminsá adaptá e rutanan i implementá un sistema di “hub”. E hub ta fungi komo un sentro di konekshon kaminda tur ruta den e region lo yega na e hub. E hub lo konektá ku otro hubnan kual lo sòru ku tur ruta ta mihó konektá ku otro. Na e momentunan aki e plan prinsipal ta pa implementá un sistema di hub na Barber kual den promé instante lo oumentá e konektividat ku Otrobanda i lo sòru ku tur ruta di konvoi na Bándabou tin mihó konekshon ku otro.

Sinembargo e direktor di ABC a splika ku usando e sistema di “hub” e servisio lo bira muchu mas frekuente. E frekuensia di konektividat ku Bándabou tambe lo oumentá debí ku kada 40 minüt lo bai tin un konvoi ku ta kore entre Otrobanda i e “hub” na Barber.

Finalmente Cijntje den e entrevista ku Vigilante a agregá ku unabes kuminsá oumentá invershon den transporte públiko mas hende lo usa esaki outomátikamente. Un ehèmpel di esaki ta e ruta ku ta kore via Lagun. Segun e direktor, nan a adaptá i alabes oumentá e frekuensia di e ruta aki i esaki a sòru ku okupashon di usuario riba e ruta a oumentá. Ademas, awor ta resultado ku e konvoi ku ta kore e ruta aki ta un dje rutanan mihó okupá na momentu ku wak kuantu persona ta kore e ruta aki ku ABC Busbedrijf.

Login