Skalo— E tabata den aire ta sirkulá for di siman pasá, pero niun hende na Kòrsou no tabata por a konfirmá, kon grandi e viktoria di MFK lo tabata, te ku awe mardugá. Konseho Supremo elektoral a konfirmá: 13 asiento.

Pero di unda e kresementu a bini? Por trata na yega na un indikashon, mester kon grandi e posibel “hanging voters” ta pa elekshon 2025. I esei tabata un prekalkulo.  Tin tres kategoria di konteo pa yega na e intento. Na 2021, tabatin un kantidat di 30.168 persona ku derechi di voto ku a opta pa no depositá nan voto. Saliendo for di punto di bista ku pa 2025, tin solamente un partido nobato na elekshon 2025, por asumí na improvisá hipotétikamente ku e sifra aki lo no kambia hopi. Anke mester konsiderá si ku un reto riba e hipótesis ta presensia di Covid na 2021 ku a pone hopi votadó na keda kas. Pero ku solamente un partido nobo den elekshon 2025, e sifra kisas no tei varia muchu distanshá. Pues mas ku 30 mil hende no tabata kla pa vota na 2021 i tabata insigur. Riba su mes, esaki ta un merkado di votadó “latento”.

Ta bini aserka ku na 2021, un kantidat di 4.728 sostenedó di lista no a keda representá den elekshon 2021. Esta e partido kual nan a bai firma pe, no a yega elekshon. No ta konosí tampoko si e grupo aki a bai vota pa elekshon na 2025, pero por asumí si ku na 2025 nan por keda kalifiká komo e di dos grupo di “hanging voters”.

E di tres kategoria ta, un kantidat di 20.934 persona ku derechi di vota a depositá nan konfiansa den 8 partido na 2021, ku no a yega parlamento. Ta trata di 3.962 pa Kambio pa Kòrsou. 3.512 pa Vishon. 3.739 pa PIN. 2.459 pa Kousa Promé. 2.391 pa Partido Demokrat. 2.241 pa KUMUN. 1.417 pa Movementu Progresivo i 1.216 pa Pueblo Soberano. Ku eksepshon di Kousa Promé,  (2.391) por inisiá un hipótesis ku grupo di persona ku derechi di voto aki, ta  den duda, esta “hanging”. Anke mester deskontá un porsentahe for di e votadónan di Kambio di Kòrsou (3.962) ku ta bai pa KEM. Un porsentahe di PIN (2.459) ku ta bai pa MAN. Un parti di e votadónan di Partido Demokrat (2.241)  kisas lo sigui e konseho pa vota PAR. Siguidonan di Faneyte ku ainda ta kere den KUMUN (1,417), parsialmente lo vota PAR.

Si konta 100% di e tres kategoria di personanan ku derechi di voto, ta yega na un “aserkamentu” di 51.094 persona ku por kai den e grupo di “hanging voters”. (nota: dos ku Kousa Promé no a yega parlamento na 2021, nan grupo di votadónan, kisas pa un parti ta na duda, pero esei no por keda proba na sifra). Ku otro palabra, MFK a mantené su kantidat di voto na 2025 i krese den e merkado ku a keda habri na 2021, ku tabata pro lo ménos 55 mil persona.

Resultado elekshon: MFK 13 asiento. Partido Nashonal 4 Asiento. MAN PIN: 2 asiento. PAR 2 asiento.