Kambio: e siman aki por spera algun eskala na e instituto di kuido nashonal, CMC

Otrobanda—Minister Javier Silvania, riba su facebook a urgi sindikato CBV i Gerensha di CMC sinta na mes pa yega na un solushon. E dos partidonan no tin akuerdo riba un kambio di struktura ku CMC kier introdusí den departamento di operashon (OK).

Ta trata di un organogram nobo ku CMC kier introdusí, pero e vakbont ta bisa no a tuma konsulta. Segun CMC esei no ta bèrdat. Tabatin diferente konsulta hasta un bríndis a tuma lugá despues di un seri di workshop ku a tuma lugá.

Den un komunikado na prensa, gerensia di CMC a indiká di ta lamentá i desaprobá akshon nan di CBV. Segun gerensha, diferente operashonnan mester a wòrdu kanselá debí na skarsedat di personal riba djarason último. E akshon di CBV i un grupo chikí den sala di operashon a wòrdu lamentá i desaprobá dor di CMC. Segun CMC, CBV su agènda polítiko kier duna un imágen malu di gerensia i esaki sigur no ta na e interes di e pashènt su seguridat òf pa e komunidat di Kòrsou,” gerensia ta bisa. E gerensha a lanta atake bastante serio den direkshon di Annaliza Mathilda presidente di CBV. Mathilda, ta wak su miembronan i ta reklamá ku empleadonan di sala di Operashon ta wòrdu trata di un forma inapropiá i intimidá. Tambe Mathilda a reklamá ku gerensia kier imponé un struktura nobo sin konsultá ku e koleganan. CMC no ta rekonosé e ponensianan di Mathilda i ta desmentí esakinan.

Segun e minister e no por intermediá mas. Maneho di CMC ta outónomo i gobièrnu, GMN, no por intervení den e relashon entre doño di trabou i trahadó. Pa evitá ku e problema ta eskala, e minister a purba na intervení i segun Silvania, direktiva di CMC a ninga di sinta ku CBV na mesa. Segun e minister e empleadonan tin hopi keho riba e struktura nobo ku CMC ke introdusí.