KRALENDIJK,—-ACE Foundation djaluna tras di lomba den oranan di atardi a anunsiá durante di un konferensha di prensa, vários proyekto ku e fundashon aki ta bai liderá e aña aki. Un di e proyektonan ta Siman di muzik pa mucha. E aña aki esaki lo keda selebrá di 21 pa 28 di mei próksimo.

E tema di e aña aki ta ‘Ban biaha rònt mundu’. E kansionnan ku lo karga siman di muzik ta “Muzik ta konektá” i “Muzik un idioma internashonal”. Direktor di ACE Foundation, Segni Bernardina a splika ku e Siman di muzik lo keda kargá den dos trayekto.

“E trayekto di den skol i e trayekto di den bario. Pa loke ta trata e proyekto di den skol, esaki mester wòrdu kargá pa EKADK ku ta un proyekto pa mas arte den skol. Nan lo bai sòru pa kada skol risibí vários idea kiko nan lo por hasi durante di e siman di muzik pa nos muchanan. Tambe nan lo risibí vários video di músikonan ku lo konta i/òf splika di nan karera komo músiko i tambe di e instrumènt ku nan ta toka.

Banda di esaki tambe nan lo risibí e kantika ofisial di siman di muzik ku e muchanan por siña kanta i balia. Nos lo buska huntu ku skolnan artistanan ku lo sòru pa charla, workshop òf presentashon den skol.

Den oranan di atardi ACE Kids Club lo bai pasa “Tour den tur bario”, huntu ku diferente partner manera Dance and More, School of Performing Arts Bonaire i Casa de músika. Steelband Silver Bullets SKAL, Magazina di Rei i mas. Kuminsando djaluna na Tera Kòrá, djamars Nort Saliña/Hato, djarason Nikiboko, djaweps Antriol, djabièrnè Playa i djasabra Rincon.

Den kada bario lo bai duna un género di músika diferente. Por ehèmpel den Tera Kòrá lo tin tayer di steel band ku ritmonan manera soca i calypso. Den Rincon lo bini e parti di instrumèntnan i músika krioyo. Mas despues ACE Foundation lo saka un skema detayá di e aktividatnan aki.

Durante di e konferensha di prensa a entregá diputado di kultura James Kroon un proposishon pa bin ku un dekreto pa ankra e selebrashon di siman di muzik tur aña.

Diputado Kroon a bisa tambe, ku e ta haña esei un bon plan i e lo ke tambe pa bin un buki ku e letranan korekto di kantikanan di ántes i tambe kon pa tokánan. Huntu ku Almar Nicolaas, ta trahando riba renobashon di vários kantika di mucha di ántes i lo bai saka esakinan durante di siman pa mucha.

Pa mas informashon tuma kontakto ku ACE Foundation, via di telefòn 790-0155 òf [email protected]