Pòst 5: Den Pakete di Pais, tin menshoná fecha pa finalisá sierto proyektonan relashoná ku desaroyo di tereno. Ainda no ta pensando riba tereno di Isla.
Isla—Si huma ta bai sali ta bai sali un dia for di pipanan riba tereno di isla, te ainda ta un charada. Lokual si ta sigur ku sin huma tin kandela, e terenonan rondó i riba Refineria Isla ta bira balioso i atraktivo pa desaroyo. Tur kos ta dependé di Kòrsou logra haña un sosio stratégiko ku for di 2018 no ta logrando.
For di 2020, Hulanda a eksihí pa Kòrsou lanta un “grondbedrijf” pa manehá tereno. “Nederland zal Curaçao bijstaan bij het ontwikkelen van een strategisch grondexploitatiebeleid en de opzet van een intern grondbedrijf”. Esaki tabatin stipulá den un akuerdo ku Hulanda i Kòrsou a firma, komo guia pa implementá un Akuerdo di Kresementu na 2020. Ulanda ke mira Kòrsou, instituí un kompania pa maneho di tereno, pafó di struktura aktual di VVRP. Algu ku Minister aktual, Charles Cooper e rechasá.
Mester bini un plan integral riba maneho di tereno, spesífikamente den kaso di e terenonan rondó di Isla. Stipulashonnan den aktual Pakete di Pais, ta indiká ku Kòrsou mester kuminsá desaroyá terenonan propiedat di Gobièrnu pa generá mihó i mas entrada estatal. Den kuadro di esaki, no mester ekskluí e posibilidat ku durante ehekushon di e Pakete di Pais, lo bini sugerenshanan bek pa instituto un kompania nashonal di Bienes Inmóbil.
Esaki ta nifiká ku chèns ta grandi ku lo bini ku un kompania pa manehá propiedat inmobilario di Kòrsou unda ta pone tur propiedat tereno i propiedat di Kòrsou. Te ainda, e terenonan rònt di haf, no tin un plan di desaroyo pero si e Refineria no habri su portanan, e balor di e terenonan ta bira konsiderabel. Segun e Pakete di Pais, Kòrsou mester introdusí un maneho pa saka mihó benefisio for di su tereno i edifisionan.
Den Pakete di Pais, tin menshoná fecha pa finalisá sierto proyektonan relashoná ku desaroyo di tereno den e.o. área di Otrobanda. Pafó di e Pakete di Pais, un área sigur interesante ta bira e tereno rònt di Haf si akaso no resultá ku portanan di Refineria ta habri. Den pasado, ya kaba tabatin intenshon pa lanta un “grondbedrijf”. Konforme e Pakete di Pais i interpretashon di klóusulanan por tin un relashon ku benta i maneho di e terenonan estatal. En todo kaso for di e Pakete di Pais ta konkluí ku “grondexploitatie” tin sosten di Hulanda pa lokual ta trata dunamentu di konseho.