Infekshon ku Covid-19 na e islanan den reino ta bahando, segun publikashon di RIVM.

PUNDA- E kantidat di infekshon ku Covid-19 na e islanan CAS i BES a baha 25% kompará ku siman pasá. Sinembargo, e situashon den hospitalnan na e islanan Kòrsou, Aruba i Sint Maarten aun ta den estado krítiko.

Di 26 di ougùstùs pa 1 di sèptèmber un total di 893 persona a tèst positivo entre e islanan Kòrsou, Aruba, Sint Maarten, Boneiru, Sint Eustatius i Saba (CAS i BES).

E islanan CAS, ta esnan ku a raportá mayoria kaso di infekshon i tambe hospitalisashon pa motibu di Covid-19. Na e islanan BES, no tin ningun kaso di hospitalisashon, segun RIVM.

Kòrsou

Manera ya ta konosí e situashon lokal pa loke ta kantidat di infekshon nobo ku Covid-19 ta bahando. Segun publikashon di RIVM, un total di 153 persona pa kada 100.000 habitante a haña un resultado positivo den e siman di 26 di ougùstùs pa 1 di sèptèmber. Esaki ta un redukshon kompará ku e siman promé, te ku 25 di ougùstùs, kaminda a raportá 204 kaso positivo pa kada 100.000 habitante.

E promedio di edat di personanan ku a keda infektá último siman ta bou di 40 aña. Ademas, análisis ta mustra ku mas hende muhé ta infektá kompará ku hende hòmber.

E situashon na CMC aun ta unu preokupante. Aktualmente tin 32 persona hospitalisá di kual 15 ta rekerí kuido intensivo. Un total di kuater persona a fayesé pa motibu di Covid-19 e siman aki, di 29 ougùstùs te ku awe.

Aruba

E kantidat di kasonan di infekshon nobo na Aruba tambe ta mustra di ta bahando. Sinembargo, aktualmente Aruba tin un total di 64 persona hospitalisá di kual 14 ta rekerí kuido intensivo na Aruba i 16 ta den kuido intensivo na Colombia, segun RIVM. Di e hospitalisashonnan aktual 18% ta bakuná ku por lo ménos un shòt di bakuna.

Manera ya nos a informá Aruba a risibí personal adishonal pa yuda akapará kuido nesesario den hospital i pa amplia kapasidat di kuido intensivo.

Aruba a raportá un total di 14 morto pa motibu di Covid-19 di 26 di ougùstùs te ku 1 di sèptèmber di kual mayoria no ta bakuná.

Sint Maarten

Despues di algun siman ku Sint Maarten kontinuamente a raportá oumento den e kantidat di kasonan positivo, e siman aki ta mustra ku e kantidat di kasonan nobo a kuminsá baha.

Aktualmente hospital na Sint Maarten (SMMC) tin 16 persona hospitalisá ku Covid-19, di kual 5 ta risibí kuido intensivo. Di e personanan hospitalisá 2 ta kompletamente bakuná.

Ademas, Sint Maarten a transportá 2 pashènt pa risibí kuido na Colombia i un pashènt pa Estados Unídos. Segun datos publiká pa RIVM, un total di 7 persona a fayesé pa motibu di Covid-19 den e siman ku a pasa.