WILLEMSTAD – For di novèmber aña pasá abitantenan di Soto i besindario no ta disponé di un dòkter di kas. Pashèntnan di dòkter Lucasius a keda sorprendí aña pasá, ora nan a tuma nota ku e dòkter a stòp di traha ku a manda nan dosié pa dòkter Janga na Barber, sin ku a konsultá ku nan.

Relashoná ku e situashon alarmante akí, Parlamentario Giselle Mc William di frakshon di MAN ta pidi atenshon di Minister di Salubridat, Medio Ambiente i Naturalesa (GMN) Dorothy Pietersz-Janga.

Segun Mc William ta konosí pa tur hende ku for di aña pasá dòkter Lucasius a baha ku penshun i ku ainda no a yena e puesto vakante di dòkter di kas pa Soto i besindario. “E situashon akí ta trese kuné ku e área di Soto i besindario e pashèntnan ta dependé solamente di 1 dòkter di kas den área di Bándabou, ku ta dòkter Janga na Barber. E problema ta ku no a notifiká e pashèntnan ku nan mester a pasa pa dòkter Janga miéntras ku e konekshon di transporte públiko den alrededor pa yega Barber tambe ta limitá. Ta sumamente iresponsabel pero tambe inhumano, pa 1 dòkter so atendé henter e área di Bánabou akí.”

Parlamentario Mc William ta enfatisá ku e situashon akí ta trese kuné ku e servisio i aksesibilidat di dòkter Pietersz-Janga no ta manera mester ta, dor di e kantidat di pashèntnan ku na e momentunan akí ta kai bou i su responsabilidat na Barber. Pa e motibu akí Mc William ke sa di Minister Pietersz-Janga si e ta na altura ku for di novèmber aña pasá dòkter Lucasius a sera su konsultorio. I si e ta na altura ku a pasa tur dosié di pashèntnan di dòkter Lucasius pa dòkter Pietersz-Janga na Barber, sin konsultá ku e pashèntnan. E miembro di frakshon di MAN a puntra ademas: “Minister ta na altura ku e situashon akí di dependé di 1 dòktober di kas na Bándabou por kosta bida di hende i servisio na pashèntnan, dor di e gran kantidat di pashèntnan?” Parlamentario Mc William ke sa tambe ta ki dia Soto i besindario ta haña un dòkter di kas manera tur otro área di Kòrsou.