Punda,– Kalkulashonnan resientemente hasí dor di Banko Sentral (CBCS) ta mustra ku na 2020 Kòrsou su ekonomia a kremp ku 19.9%. Nos tur sa ku e pandemia di Covid a hinka Kòrsou den un krisis ekonómiko nunka bisto, kaminda hopi negoshi a sera nan porta i hende a pèrde trabou. CBCS a kalkulá ku desempleo a oumentá te mas ku 24%.

E sífranan menshoná lo tabata pió si Gobièrnu no a introdusí e medidanan di sostén, manera entre otro NOW i TVL. A base di sífranan preliminar CBCS ta mustra ku mas ku 34.000 persona a benefisiá di e medidanan di sostén. Sin e medidanan aki, mas negoshi lo a sera nan portanan i e kontrakshon ekonómiko lo tabata mas ku 19.9%. Ku tur probabilidat e medidanan di sostén a evitá tambe un éxodo di nos hendenan pa Hulanda i pone tambe ku e oumento di pobresa bou di nos hendenan tabata menos. Pues, nos por konkluí ku e medidanan di sostén a yuda grandemente, pa kual VBC ta hopi gradesido. Mirando ku ainda nos ta den e pandemia, por lo pronto lo tin e nesesidat pa e medidanan di sostén aki.

Awor, e pregunta klave ta, ta kon a hasi finansiá e medidanan di sostén aki? Ta di unda e sèn a sali? E kontesta ta masha simpel. E medidanan di sostén aki a wordu finansiá dor di e sostén di likidés ku Kòrsou a haña for di Hulanda den forma di fiansa ku interes na 0%. Mirando e krisis ekonómiko ku nos ta den ketu bai, nos mester konkluí ku por lo pronto nos lo tin mester di sostén di likidés. VBC resientemente a komprondé for di medionan di prensa ku posishon di likidés di nos pais ta deteriorando rápidamente i ku kisas ya pa yüni Gobièrnu lo no por kumpli ku su obligashonnan finansiero. Mas aún, VBC a tuma nota tambe di e karta di Sekretario di Estado sr. Raymond Knops, ku a sali den medionan di komunikashon e siman aki.

Den su karta sr. Knops ta menasá ku ta stòp e sostén di likidés, si Kòrsou no kumpli ku e palabrashonnan hasí. I netamente VBC a splika awor ei, ku basá riba e analisis di CBCS, por lo pronto nos lo tin mester di e sostén di likidés ei, pa evitá lo peor. Den e kuadro aki VBC a keda kontentu di tende e ekspreshonnan hasí dor di sr. Javier Silvania, e futuro Minister di Finansas, ku por lo pronto lo sigui papia ku Hulanda i sr. Knops pa por sigui haña e sostén di likidés.Sea ta kana e trayekto di COHO of ta sinta na mesa pa negoshá algu otro ku Hulanda, pero un desishon mester kai hopi rápido. Situashon di nos pais ta pone ku no por pèrde mas tempu.

E Gobièrnu aktual ta demishonario i no ta gosa di sostén di un mayoria den Parlamento. Pues por spera ku e Gobièrnu aktual lo no bai tuma niun akshon nobo pa trese kambio of stimulá nos ekonomia, mirando tambe ku e Gobièrnu Pisas/Larmonie ta suppose di asumí responsabilidat di gobernashon pronto. Tumando tur e puntonan menshoná ariba na konsiderashon i ku nos pais ta den un krisis profundo, ta imperativo pa Kòrsou tin un Gobièrnu ku por tuma desishon i akshon rápidamente. Awor aki Kòrsou no ta sirbí ku un Gobièrnu demishonario.

Ta p’esei VBC ta urgi tur e instanshanan konserní ku ta enkargá ku trabounan di “screening” di e mandatarionan nobo, pa por fabor duna e trabou aki un prioridat haltísimo i hasi nan máksimo esfuerso pa esaki por keda kla mas pronto posibel. Di e manera ei Kòrsou por tin un Gobièrnu ku ta mishonario atrobe i ku por tuma akshon rápido i desisivo pa saka Kòrsou for di e krisis ku e ta den. VBC ta pará kla pa huntu ku tur otro stakeholder yuda Gobièrnu pensa i traha pa fomentá kresementu ekonómiko i bienestar pa tur hende na Kòrsou.