Back to Top
Vigilante banner image

Hulanda: Skarsedat di awa di bebe den futuro


September 27, 2022 • 1 minüt pa lesa

UTRECHT—Denter di algun aña por surgi un skarsedat di awa di bebe den Hulanda, asina kompanianan di awa ta bisa den un rapòrt.

Segun e kompanianan di awa di bebe e sistema di awa ta yegando limitenan di sekura, i e demanda pa awa ta grandi pa motibu ku poblashon i ekonomia ta krese i mas kas ta keda konstruí. 10 kompania ta splika ku si no tuma medidanan, no por garantisá ku e 900.000 bibienda nobo ku gabinete kier konstruí lo por haña awa di bebe na tempu. Nan ta boga pa mas medidanan i urgensia di gabinete. E 10 organisashonnan di awa di bebe tin obligashon pa lei pa entregá awa di bebe. Mester tin sufisente awa pa awor i futuro pa entregá awa di bebe na konsumidónan i otro instanshanan. Den e rapòrt e kompanianan ta argumentá ku promé ku 2030 mester produsí mas awa di bebe pa por kumpli ku e demanda. Pa logra e meta aki mester oumentá e kapasidat di produkshon i distribushon.

Serka tres kompania, Dunea, Vitens i Waterbedrijf Groningen, e nesesidat ta agudo. Ku awa ta sali for di kranchi ta outomatiko, pero no t’asina, segun e asosashon di kompanianan di awa. Banda di e demanda kresiente kompanianan ta konfrontá tambe mal kalidat di fuentenan di awa pa motibu di polushon di agrikultura, industria i hogarnan. Generashonnan futuro tin rísiko lo keda konfrontá ku ménos awa konfiabel. Kompanianan kier pa fasilitá permit pa produkshon di awa. Mas aleu mester invershon den maneranan nobo di produkshon di awa manera awa di bebe for di awa laman.

Login