Back to Top
Vigilante banner image

Skarsedat di Diesel ta afektá kunuku na Venezuela


May 20, 2021 • 2 minüt pa lesa

Kunukeronan a kuminsá usa buriku pa prepará nan kunuku, pero esaki lo no ta sufisiente.

Caracas,- Sanshon Merikano riba Venezuela a kuminsá afektá kunukunan Venezolano.

Debí na violashon di derechi humano i korupshon riba diferente nivel den e gobièrnu Venezolano, Merka a buta sanshon riba Venezuela pa asina ofisialnan Venezolano por tuma distansia for di nan funshon pa asina e otro hende lo por yega na poder. Segun Merka, e sanshon nan no tin ningun efekto riba e ekonomia di Venezuela, pero en realidat esaki no ta e kaso.

Ordu ehekutivo 13808 ta restringí tur transakshon entre Merka i PDVSA. E òrdu aki en kombinashon ku 6 otro sanshon, awor a sòru ku Venezuela ta den un krísis ekonómiko ku awor lo afektá e traktor di e kunukero Venezolano.

Kunukero Agustin Zenere, ku ta spesialisá den kosecha di maishi, ya kaba a duna di konosé ku e ta dos siman lat pa planta simia di maishi. E problema ta sinta ku e gobièrnu no a duné sufisiente diesel pa e por manehá su vehíkulonan di plantamentu. Aworakí e kunukero su tereno di 30 hèktar ta yená ku mata morto debí ku e no por hasi nada ku su tereno. Tin mas kunukero ku ya a duna di konosé ku nan tambe tin skarsedat di diesel i esaki por afektá e entrega di kuminda fresku na e supermerkadonan.

E situashon a yega den parlamentu Merikano pa asina nan debatí i wak si nan por aliviá algun sanshon ya sikiera e kunukero tin sufisiente diesel pa por planta i kosechá bèrdura i fruta.

Tin kunukero ku ya ta wardando dos luna pa risibí diesel. Den un rueda di prensa presidente Maduro a duna di konosé ku e ta na haltura di e problema i den 60 dia tur kunukero lo risibí sufisiente diesel pa nan vehíkulo, pero te ainda esaki no a tuma lugá.

Lider di oposishon Juan Guaido tambe ta na haltura di e situashon. Guaido a pidi merka pa traha un konstrukshon kaminda e pais por importá solamente diesel pa asina e kunukero por us’é. Juan Guaido si ta di akuerdo ku e sanshon nan Merikano debí ku segun Guaido, esaki lo fòrsa ofisialnan korupto pa renegoshá nan posishon den e gobièrnu.



Login