WILLEMSTAD – Opleidingsinstituut Rechtshandhaving & Veiligheidszorg (skol di polis, ORV) i Kuerpo Polisial di Boneiru (KPCN) a uni forsa den un inisiativa edukashonal pa apirantenan pa bira ámtenar di kuerpo polisial.

Den un inisiativa regional, Boneiru a someté un petishon ofisial pa por hasi uso di dos dosente di ORV. “Mas ku klaro ORV a ekstendé mannan kooperativo i pone instruktornan renombrá i ku un konosementu profundo riba e tereno di IBT na disposishon, pa duna lès integral di kapasidatnan.”

Ta konsiderá dosentenan Muller i Martina komo “crème de la crème” den e área di formashon hudisial i polisial, hasiendo nan e kandidatonan ideal pa duna guia i instrukshon na un nivel profeshonal. “Nan partisipashon lo no solamente elevá e kalidat di entrenamentu, pero tambe lo fortifiká e lasonan entre e islanan den region.”

ORV ta kontentu ku e interkambionan akí, resaltando e importansha di kolaborashon inter-insular. “ORV ta konsiderá esaki komo un oportunidat ekselente pa kompartí eksperensia i kontribuí na desaroyo di e próksimo generashon di polisnan na Boneiru. E interkambio akí ta enfatisá e balor di kolaborashon di konosementu entre e islanan i ta marka un paso prometedor pa futuru kolaborashonnan i inisiativanan edukativo entre e islanan.