Fanatikonan di Liga Pabou tabata na bòshi ayera den Frank Curiel Ballpark na Santa Maria, pero kos no a bai manera nan tabata deseá.

Santa Maria,– Vigilante a bin ta risibí e resultadonan di weganan di Little League relativamente lihé despues di e weganan.

Ayera e kos tabata poko straño i nos a keda purba te den oranan lat di anochi, kaminda despues nos a bin komprondé ku despues di wega e skorer mester a prima save pa asina e datonan keda den e tablèt, pero na lugá di esaki el a primi delete poniendo ku tur informashon a bai pèrdí i mester a bai sinta wak e wega di nobo via televishon pa sinta skor esaki. E pregunta mesora a surgi kon esaki ta posibel, paso no ta tur hungada ta pasa na televishon i tampoko no ta tur lansamentu por mira. Lokual sigur mester bai na tene kuenta kuné, ta ku den Little League konteo di picheo ta importante i pues lo mester wak hopi bon pa no bini konfushon den esaki. Tambe Vigilante a komprondé ku e skorer a bisa ku e wega tin ku bai 7 inen, siendo ku den Little League regla ta bisa ku ta 6 inen ta hunga i kual semper a keda apliká hasta den mundial. Ta bon pa e komishon ku ta supervisá e weganan di Little League tene kuenta ku e kosnan aki i pone mas atenshon pa evitá ku e situashon aki por kousa problema. E weganan mas ta bayendo bon, fanatikonan ta komportando super bon i ta si spera ku esaki lo keda asina te final.