PUNDA—Segun Minister Javier Silvania, e ofisina di akountent i konseho organisatorio, SOAB, ta envolví den diferente trayekto estatal, lokual a rekerí un oumento riba presupuesto, pa finansiá nan gastunan di operashon. Segun miembro di parlamento, Steven Martina ta trata di 7.7 mion florin.

Segun Silvania, e tareanan di SOAB a oumentá drástiko kompará ku 2022, lokual ta e periodo ku Martina a menshoná komo oumento. Banda di e kontròlnan di kuenta anual 2023 i 2024 di Pais Kòrsou, i tambe e kòntròl interino i kuenta anual di aña 2025 di Pais Kòrsou, e rekursonan adishonal aki ta nesesario na SOAB. Prinsipalmente pa trayektonan nobo, kual tur ta relashoná ku mehorashon di maneho finansiero, mehorashon di kumplimentu di impuesto, optimalisashon di e organisashon atministrativo i kòntròl interno i tambe e implementashon di vários kapítulo di e Landspakket:

1. Trayekto pa oumentá entradanan di impuesto pa Pais Kòrsou. Den e akuerdo di gobernashon 2021-2025 ta dediká atenshon eksplísito na un maneho finansiero sano den un sentido amplio i tambe na oumento di ‘compliance’ en partikular. Den e kuadro aki, SOAB ta i lo keda sostené outoridatnan di impuesto den oumentá e kapasidat di kobramentu i den limpiesa di e dossier di aanslag.

2. Trayekto pa oumentá entradanan ku no ta relatá na impuesto Kòrsou. Análisisnan di presupuesto a mustra ku e “begrotingskader” (esaki ta nifiká lokual ku gobièrnu por gasta e siguiente aña) ta wòrdu eksperensha komo no sufisiente, loke ta kousa ku realisashon di maneho (beleid) ta stagná. Pa medio di e investigashonnan realisá ku ayudo di SOAB na e diferente ministerionan, enkuanto entradanan No-Fiskal a bin demostrá ku e entradanan aki no ta wòrdu kobra

3. Trayekto pa yuda logra e metanan finansiero-administrativo ku ta pone den e akuerdo di gobernashon 2021-2025.

4. Trayekto pa sostené gabinete di Minister di OWCS enkuanto entre otro duna konseho riba kontenido, faktibilidat i integralidat di e proyektonan, presupuestonan i e plan di mas aña di e Ministerio di OWCS.

5.Trayekto pa sostené gabinete di Minister di BPD enkuanto entre otro implementashon di vários kapítulo di e landspakket, mehorashon di maneho finansiero, mehorashon di e organisashon atministrativo i kontròl interno dor di SSO.

6. Trayekto pa sostené Domeinbeheer den ehekushon di e programa ‘Grond en Vastgoed 2021-2026’, kaminda e sosten aki ta dirigí prinsipalmente na monitoriá e vários proyektonan ku e meta pa garantisá kalidat di e resultadonan di e proyektonan aki. 

7. Trayekto pa sostené Minister di Desaroyo Ekonómiko den ehekushon di e landspakket i e agènda di implementashon asosiá pa loke ta trata Desaroyonan Ekonómiko.

Segun Silvania, e trayektonan menshoná ta importante pa asina entre otro por subi e entradanan fiskal di gobièrnu. Esaki ta algu ku ya kaba nos por mira su balor, pasobra e entradanan fiskal di gobièrnu a subi signifikantemente, te asta nos ta riba kaminda pa kibra otro rekòrt den 2024. e entradanan aki ta nesesario pa por kubri e gastunan di pais. Esei ta pone ku e èkstra fondo ku ta bai SOAB en bèrdat ta nesesario i na lugá pa asina fondonan por wòrdu kreá pa kubri nesesidatnan di kada ministerio. Tambe  ta kla pa introdusí den 2025 e diferente solushonnan pa subi e entradanan no-fiskal. Tambe ta asina ku diferente ministerio a logra diferente di nan metanan den diferente di e trayektonan ku SOAB ta sostené. Tur esaki ta demostrá ku e oumento di e montante otorgá na SOAB ta unu responsabel i ku ta duna fruta.