E desaroyo di défisit ta yega kasi 600 mion na Desèmber 2021

Punda—Covid sin duda algun a hinka Kòrsou den hopi mas tantu debe i si Gobièrnu sigui tuma mas fiansa durante 2021, pa finansiá défisit di likides e debe nashonal por subi 4 bion florin. Esaki ta sifranan i pronóstiko di Finansas Públiko ta señalá.

Sin sosten finansiero di Hulanda, Kòrsou tin mester un finansiamentu di likides na kasi 550 mion florin. Esaki ta durante luna nan di Yüni 2021 pa Desèmber 2021. Manera e grafikonan ta ilustrá, e défisit ta oumentá for di yüni i yega kas 600 mion florin na Desèmber 2021. Un fiansa pa kubri e likides aki ta pone Kòrsou den mas debe na Hulanda i alabes ta oumentá e kota di debe nashonal pa yega entre 3.6 pa 4 Bion Florin. Esaki ta un suma kasi igual na 2010, na momento Hulanda i Kòrsou a yega na un areglo di restrukturashon di e debe nashonal. Den 12 aña di gobernashon outónomo e debe a yega na mesun nivel bèk.

Durante hinter di dos mitar 2021, Kòrsou su entrada ta keda bou di su gastunan kousando un défisit total di 540 mion florin pa finalnan di desèmber. E trènt aki a bini ta desaroyá for di aprel 2020, despues di Covid pero durante 2020 Kòrsou a risibi sosten finansiero fo’i Hulanda di 670 mion florin. Manera ta konosí, Hulanda ke mira Kòrsou pasa tres lei pa inisiá e proseso di COHO. E leinan ta enserá pa baha salarionan di Parlamentarionan, Ministernan i Direktornan di Institutonan Gubernamental. Tin 168 mion reserva pa Kòrsou pendiente e medidanan. Si Kòrsou ehekutá e medidanan, ta nifiká un oumento den e debe nashonal i na kaminda pa surpasá 4 Bion florin na debe nashonal.