Back to Top
Vigilante banner image

Spesialistanan YDK ta duda pa regresá Kòrsou debí na plafòn salarial


June 1, 2023 • 2 minüt pa lesa

Mr Mirto Murray kende a hiba defensa pa asosiashon di spesialista LVMPiLC.

NIEUWE HAVEN,– Abogado mr Mirto Murray, kende a representá e asosiashon di spesialistanan(LVMPiLC) durante e wisio sumario kontra di gobièrnu, a indiká ku e plafòn salarial ta un rísiko ku spesialistanan lo bandoná CMC.

Durante tratamentu di e wisio sumario kaminda CMC i asosiashon di spesialista LVMPiLC ke eksonerá dòkternan médiko for di e plafòn salarial, abogado Mirto Murray a splika ku e plafòn salarial lo bira un dje rason nan dikon spesialistanan lo bandoná CMC. Den kolaborashon ku Asosiashon Médiko di Antias(AMA), ámbos asosiashon a puntra algun miembro si nan ta duda pa debolbé Kòrsou mirando e diskushon nan rondó di e plafòn salarial(e lei LNT). For di un enkuesta yená dor di 28 spesialista Yu di Kòrsou, 93% a indiká ku nan ta duda pa regresá Kòrsou mirando ku e lei LNT ta na vigor.

Algun dje spesialistanan Yu di Kòrsou ku a yena e enkuesta riba un forma anónimo por a duna un reakshon tambe. Un dje reakshon nan tabata “Salario ta hopi ménos ku nan tabata promé. Añanan largu di estudio kaminda debe ta wòrdu akumulá durante un formashon médiko di 6 – pa 7 aña. Despues di esaki, mester bai den promoshon i ta traha komo ANIOS. I despues, ta spera ku bo por drenta den un estudio di spesialisashon. Si finalmente bo logra drenta, ta tuma otro 10 aña promé ku bo por bira un spesialista. 16 pa 17 aña despues ku bo a muda awor bo tin speransa pa bolbe bèk. I despues di invertí tantu aña, bo ta gana asina tiki. No mi no keda sorprendé si despues lo tin solamente dòkternan i spesialistanan di Latino Amérika òf spesialistanan penshonado.”

Un otro spesialista Yu di Kòrsou a reakshoná indikando ku “mi ta den negosiashon ku CMC, nan ta interesá pa sigui ku mi, pero mi ta wardando mas ku 2 luna pasobra nan no por duna mi un oferta pa motibu di inseguridatnan relashoná ku e lei di plafòn salarial(LNT). Esaki tambe tin impakto riba mi plan nan den futuro na Hulanda”.

Login