Mullet Bay na e momentonan aki ta un ruina.

Philipsburg—Parlamento di St. Maarten ayera trata e problemátika di Mullet Bay na St. Maarten. Parlamento. Ayera tabatin un reunion pa forma un komishon ku mester keda enkargá pa inisiá e proseso pa un enkuesta parlamentario.

Esei ta nifiká ku e promé intento serio a inisiá pa kuminsá rekuperá Mullet Bay den bolsa di nan propiedat di tereno a inisiá. E komishon lo keda enkargá pa traha riba un diseño pa yega na un enkuesta. Despues ku e diseño finalisá, ta instalá un komishon den parlamento pa ehekutá e enkuesta. Un enkuesta parlamentario ta un investigashon profundo riba e tópiko stratégiko i históriko pa determiná prinsipalmente efektonan den e pais i alabes aklará puntonan di konflikto pa tuma medida riba esakinan.

Mullet Bay ta wòrdu konsiderá e pida tereno mas atraktivo na e St. Maarten. No awor sino for di finalnan di dékada 60 pa 70. Bou di gobièrnu di Claude Wathey i ala demokrat, gobièrnu di St. Maarten a duna derechi di erfpacht na un kompania ku tabata yama Island Gem Enterprises. Island Gem tabata un kompania ku akshonistanan estado unidense manehá bou di Herb Mercer kende tabatin un vishon pa krea unu di e komplehonan turístiko mas grandi den Karibe.

E hotel a haña e nòmber di Mullet Bay Beach Resort i ta keda ubika na kosta sùit di e isla apénas 5 minüt for di aeropuerto i tin e playa mas bunita dje isla. E nòmber di Mullet Bay a bini pasobra miéntras na sùit e proyekto tin e playa na nort e tin un laguna konsiderá un arte di naturalesa, unda e piska “Mullets” (Aldu na papiamentu) tin su habitat natural.

Finalnan di dekada 60 Island Gem Enterprises a kuminsá konstruí Mullet Bay. Ta trata di un tereno di kasi 175 hèktar . Island Gem, a kuminsá konstruí e promé apartamentonan na entrada dje kompleho i tabata unidatnan di 8 apartamentu bou di un dak, pegá na otro den forma di un “H”, kada unu ku nan propio dak. E unidatnan tabata na benta komo “shared ownership”, esta un apartamento por tabatin diferente doño. Aparte di a konstruí e apartamentonan, Island Gem a laga konstruí den Mullet Bay un kancha di gòlf, ku pa su époka tabata esun mas bunita den Ost Karibe.

Ya pa inisio di dékada 70, Mullet Bay a resultá den un éksito. En total e hotel tabatin na 1974, mas ku 600 unidat di apartamento, kada unu ku dos kamber, kushina sala i pòrch, full na erko. Island Gem a konstruí un paraiso na St. Maarten, un isla vírgen den Karibe. E isla no tabatin kaminda di asfalt, sino solamente den áreanan rondó di Philipsburg. Mullet Bay tabata ubika den Low Lands, i pa yega stat, turista tabata kore riba kaminda di tera pa kasi 25 minüt.

E kompleho na 1976 tabata konsistí di, 1 kasino, 1 playa, 1 shopping mall, 7 restorant, 2 pisina grandi, 1 supermerkado, 1 fábrika di utilidat (e hotel tabata produsí su propio awa i koriente), un kompleho di estadia pa empleadonan ku no tabatin un kas, un restorant pa empleadonan por kome 3 biaha pa dia in kancha di gòlf di 18 buraku. Pa por a transportá e turistanan den e 700.000 meter kuadrá tabatin 8 vèn bus ta sirkulá 24 ora pa dia. Na 1995, Orkan Luis a destruí e kompleho di hotel na ruina.