Back to Top
Vigilante banner image

STRAF i ABVO no ta haña asiento den grupo di trabou di Duana


March 17, 2023 • 3 minüt pa lesa

Sindikato STRAF lo no haña asiento  den e grupo  di trabou  di Duana ora ta reuní ku minister Silvania.

WILLEMSTAD – Minister di Finansa Javier Silvania lo sinta tur luna ku Tim di Maneho di kuerpo di Duana i lo informá sindikatonan mesora tokante desaroyonan. Porlotantu e sindikatonan STRAF i ABVO lo no haña asiento den e grupo di trabou ku ta atendé entre otro alohamentu dje personal.

E personal a protestá e estado dje edifisio na Nieuwe Haven resientemente dor di pone trabou abou temporalmente. Huntu ku nan sindikatonan, nan a demostrá nan preokupashon relashoná ku e situashon deplorabel dje edifisio i a eksigí un solushon, sino nan no ta traha mas bou di e sirkuntansianan laboral ei. Nan lo wèlga. Minister Silvania a bai papia personalmente ku e trahadónan i e sindikatonan i a primintí di duna su sosten pa yega na un posibel solushon mas lihé posibel.

Aktualmente, e grupo di trabou dje kuerpo ta buskando un otro edifisio pa alohá e personal temporalmente, miéntras ta buska un solushon. Ya un parti dje personal dje departamentu ku ta atendé ‘aangifte’ a muda pa e edifisio na Handelskade den Punda, ku por sierto tampoko ta den e mihó estado. E grupo di trabou ta investigando a base di un inventario un kantidat di lokalidat alternativo pa e sobrá trahadónan. Lo skohe un edifisio mas pronto ku ta posibel.

E grupo di trabou ta konsistí di funshonarionan di duana ku sea ta òf no ta miembro di sindikatonan. Segun e maneho di gobièrnu, e sindikatonan mes no tin asiento den e grupo di trabou. Esaki ta algu ku prinsipalmente e sindikato ABVO a bisa públikamente di lo ke mira kambio den dje. E sindikato ke asiento den e grupo di trabou, ya nan por informá nan miembronan mas mihó i diligente tokante desaroyo di tur aspekto.

Pero Minister Silvania no ta mira e nesesidat di esaki. “Minister i e tim di maneho di duana ta reuní ku e sindikatonan tur luna. Den e reunionnan aki ta informá sindikatonan tokante di e státus di asuntunan di personal, alohamentu i reforma di duana. Minister a indiká ku no tin opstákulo finansiero pa e personal yega na un alohamentu temporal durante di e periodo di renobashon, i a pidi e grupo di trabou pa informá e personal di duana tur luna tokante di e desaroyo di e asuntunan.”

Curaçao Ports Authority (CPA) ku ta doño dje edifisio na Nieuwe Haven, lo mester renobá e edifisio aki. Pa motibu di retraso den mantenshon, e kondishon di e edifisio a bai atras di tal forma ku e no ta adekuá mas pa duana funshoná den dje. Tantu e departamento di brantwer komo ARBO Consult a indiká ku e edifisio no ta bon pa salú, seguridat ni bienestar dje trahadónan di duana.

“Minister a delegá e responsabilidat pa buska solushonnan na duaneronan mes. E tim di maneho di duana a forma un grupo di trabou pa buska un solushon duradero pa alohamentu di Duana, tantu pa término kòrtiku, komo término largu. Minister Silvania a enfatisá ku e grupo di trabou tin e tarea pa pone e trabounan kuminsá kana i a indiká ku lo e asistí na e próksimo reunionnan di e grupo di trabou pa yuda solushoná eventual difikultatnan. Entretantu, a yega na un akuerdo ku CPA, e propietario di e edifisio, ku lo renobá e edifisio pa e por kumpli ku e normanan di salubridat i kalidat di ARBO, i tambe ku e deseonan i eksigensianan di alohamentu di duana. Durante di e periodo di renobashon e personal lo mester wòrdu aloká temporalmente na otro lokalidat.”

Login