Nieuwe Haven– Subida di kosto di logísitika tin un impakto fuerte riba nos komunidat. Esaki ta debí ku nos ta dependé masha hopi di importashon. E inflashon di transporte di karga internashonal ta un di e vários impaktonan di COVID-19, aki nos ta papia di un subida di mas ku 50%, for di e merkado di Lejano Oriente. For di Europa i USA tambe tin un subida di 20/ 25% respektivamente. Un ehempel di subida for di Lejano Oriente ta k una aña 2020 kosto di un i kònteiner tabata na rason di 3.000,00 US $ awe tin un balor di mas ku 12.500,00 US $.
E subida aki no ta un fenómeno ku ta originá pa motibu di (mal) maneho sino un fenómeno ku su orígen ta debí na e asina yamá “systematic risk”. “Systematic risk” ta nifiká e risiko ku hinter merkado global tin di haber kuné. Si nos por indentifiká e forsa ku tin di aber ku e risiko sistemátiko aki, kual ta e desekilíbrium entre demanda i disponibilidat. Por ehèmpel, konsumidó merikano su patronchi di kompra a kambia durante e pandemia i lockdown: un kambio pa online shopping, kaminda ántes gasta sèn na restorant i baimento ku fakansi, awor ta gasta esaki na entre otro paña, kòmpiuter i muebla un ofisina na kas i esaki a i ta tumando lugá na un nivel astronomiko.
E nivel di volumen ta rekeri hopi mas kònteiner ku konsekuentemente tin disponibel riba merkado. E skarsedat di kònteiner aki pone ku disposishon di kònteiner a haña mas balor. I esaki ta kondusí na un inflashon di transporte di karga internashonal. China ta eksportando muchu mas tantu produkto pa Merka i Europa, I na e otro un banda Merka i Europa ta eksportando ménos pa China. Mirando ku ta trata di e forsa ekonómikonan mas fuerte di mundu, nos por bisa ku dinámika di eksportashon entre China, Europa i Merka ta e prinsipal figurante ku ta den desbalansa di demanda i disponibildat di kònteiner.