E hòmber tabata pone nan drumi pa por a abusá di nan.

BOGOTA – E Kuerpo Tékniko di Investigashon di Fiskalia Sekshonal di Cundinamarca, huntu ku e Ehérsito Nashonal, a yega te na un konhunto residensial di e munisipio di Soacha, Colombia, pa asina realisá detenshon di un hòmber ku tabata hunga ròl di bruho pa abusá seksualmente di kuater menor di edat.

E abusador, identifiká komo Diego Fernando de Francisco Lagos, a keda mandá prizòn pa delitunan di pornografia infantil, akseso violento grave, aktonan seksual den personanan inkapasitá di resistí i poseshon di arma di kandela.

Durante di e kaso aki, e fiskal enkargá a nara ku e hòmber kapturá, konosí komo “Tony”, tabata lesa karta na un di su víktimanan i a indiká na dje ku su pareha lo keda asesiná i ku un hende aparentemente lo ta hasi trabou di brua pe, pero ku e tin un energia seksual i ku e dia siguiente e mester a bini bèk pa un supuesto limpiesa. Ku e limpiesa aki supuestamente e lo liberá di e trabounan ku tin kontra di dje i tambe kontra bida di su pareha.

Durante entrada na e bibienda di e detenido, e investigadornan a haña un kamber sospechoso ku tabata keda dediká na santeria, un lugá ku sensia, bela i pòpchi nan yená ku angua, kua nan tabata keda uzá pa hasi brua.

Entre e prueba nan a haña tambe un telefòn selular ku tabatin informashonnan di yamadanan i tambe foto di e menor di edat ku a hasi e denunsia.

Segun e pruebanan presentá pa e organismo, e menornan di edat tabata aksedé na regresá pa e hòmber no publiká e material ku tin di nan, kua e tabata saka na momentu ku nan tabata sedá i sunú.

E supuesto bruho tabata indiká na e víktimanan ku pa nan saka tur e trabounan malu òf demoño nan tabatin ku asistí na e sekshonnan ku e tabata realisá na su bibienda. Na momentu ku e hóben nan tabata yega, nan tabata haña un bibida komo parti di e supuesto tratamentu, kua tabata pone nan drumi, pa e hòmber kometé su abusunan.

Komo ku esaki no tabata sufisiente, Diego Fernando a realisá video i foto pa menasá su víktimanan pa nan sigui bini bèk.

Mas aleu fiskal a indiká ku tabatin imágen di muchanan kompletamente sunú i tabatin 16 grabashon den e telefòn selular.