Back to Top
Vigilante banner image

Ta nesesario pa pone presupuesto na òrdu mas pronto posibel


June 30, 2021 • 2 minüt pa lesa

Willemstad— CFT a indiká ku e gobièrnu nobo di Kòrsou tin basta reto pa loke ta trata e presupuesto (multi-anual). Kòrsou mester traha i ehekutá un plan den kua ta redusí e défisitnan den e presupuesto multi-anual. Mester implementá urgentemente vários kambio i ekonomisashon den kuido i seguridat sosial pa por garantisá ku e sistema sosial ta keda duradero i pagabel pa futuro generashonnan.

E presupuesto aprobá di e aña aki no ta kuadra mas i ta nesesario pa adapt’é, Cft a presentá vários rekomendashon pa logra esaki. E rekomendashonnan ta enserá entre otro introdukshon di reforma den e sistema fiskal, dirigí riba simplifikashon, kresementu ekonómiko i maneho di gastu, i un repartishon di entrada mas igual. Ademas a hasi rekomendashon pa mehorá strukturamentu e siklo presupuestario i di responsabilisashon, e maneho finansiero i e proseso pa determiná na un forma responsabel kon ta atendé ku akshonnan di entidatnan di gobièrnu.

Kòrsou tin un retraso ekonómiko di hopi aña i envehesimentu di e poblashon, i a haña gòlpi fuerte di e pandemia di corona. Na mes momentu e pais tin un potensial enorme pa desaroyo ekonómiko. Prinsipalmente den e sektor di hospitality/turismo por logra hopi riba término kòrtiku. Ta di suma importansia den e añanan benidero pa pone e situashon finansiero di gobièrnu na òrdu i pa pone ekonomia di Kòrsou krese. Reforma ekonómiko, reforma fiskal i maneho di gastu lo ta krusial den e proseso aki.

A medida ku e ekonomia ta rekuperá sufisientemente, e nivel di dependensia di negoshinan di medidanan di sosten manera NOW i e kompensashon pa gastunan fiho (tegemoetkoming in de vaste lasten) mester keda redusí mas lihé posibel. Di e forma aki e défisit presupuestario pa 2021 tambe lo baha. E aparato gubernamental por bira mas efisiente ku un ehekushon apropiá di e proyekto di Retiru Boluntario Adelantá (Vervroegde Uittreding – VVU), ku ademas por brinda posibilidat di karera nobo pa e generashon hóben. Den e kuadro aki Kòrsou – kompará ku otro paisnan Karibense – por realisá un aselerashon si e ehekutá e medidanan i reformanan menshoná den e pakete nashonal (landspakket).

Seguridat sosial i kuido ta forma un parti importante di finansa públiko. E fondonan sosial ta konfrontá défisit finansiero struktural, ku ta bai pisa mas i mas riba e presupuesto nashonal. Ta na e gobièrnu nobo pa tuma desishon tokante di e reformanan i pa ehekutá esakinan riba término kòrtiku. Sin e reformanan aki seguridat sosial i kuido aktual lo no ta sostenibel.

Pa e di tres kuartal Hulanda a komprometé su mes kondishonalmente pa ANG 168 mion pa sosten di likides. E sosten aki ta nesesario pa por apsorbá e último konsekuensianan di e krísis di korona. Pa evitá retraso innesesario i hustamente aselerá e rekuperamentu ekonómiko, Kòrsou pronto mester tuma un desishon tokante di e kondishonnan ku Hulanda a stipulá. Rekuperashon ekonómiko ta kuminsá awor i esaki lo mester kondusí na un redukshon lihé di e posishon di debe akumulá.



Login