WILLEMSTAD,—-Na 2023 a lansa e konsepto nobo kaminda mayoria banda popular, grupo di karnaval, turista, artista individual i e grupo grandi di fanátikonan di karnaval a partisipá na apertura di karnaval. Esaki por bisa sin duda ku tabata un éksito rotundo.

Pa 2024 FDKK lo amplia e eksperiensha aki. No solamente tin un apetit grandi di gruponan di karnaval pa partisipá den e “Marcha di Karnaval” den Curaçao Festival Center. Pero tambe tur e gruponan por topa i gosa huntu ku otro den e “Carnival Village”. Esaki ta hasi e eksperiensha aki, unu úniko. Banda di tur e agrupashonnan lokal manera ERA, ONE, Grupo GRIK, ICONS, lo tin tambe e DJ nan popular manera DJ FAB i DJ KROKZZ.

Huntu ku esakinan pa promé biaha lo bo haña e trailernan manera ta kustumbrá den marcha di karnaval kompañando e gruponan di karnaval di mucha pa DJ Black, gruponan di karnaval di Tiner pa DJ RO-1 i finalmente gruponan di karnaval di adulto, pa Huerta ta toka. Apertura di Karnaval no por ta kompleto sin presentashon di su Rei di Tumba, p’esei e anochi aki nos rei di tumba RAEY tambe lo tei presente.

Pa por pone e “chèri” riba e bolo i pa duna e apertura un karakter internashonal FDKK a logra kontratá e mega artistanan di e banda super popular KASSAV, ku ya kasi a bira un parti di Kòrsou, pa por tei e anochi aki.

Un anochi ku tei bira un espektákulo karnavalesko tur afó. Sitio lo bai ta Curaçao Festival Center i e evento ta kuminsá 5’or di atardi i e ta terminá 2’or di mardugá.

Karchinan lo ta na benta na e siguiente puntonan: Mensing Caminada, 24 uur uit de muur, Ticket Point Zeelandia, Vd Tweel i tambe serka miembronan di grupo di karnaval partisipante, for di awe.

Ta asina ku Herman ‘Manchi’ Harms, a konfirma un ke otro bisando lo siguiente: “Ku gradesimentu na nos partnernan manera “Departement of OWCS” i FLOW, nos a logra yega na un akuerdo ku Sinterklaas, pa por ofresé pueblo di Kòrsou kompleto un preis di entrada speshal ku lo ta vigente di 1 di dezèmber pa 6 di desèmber benidero, pa solamente 25 florin. Despues di esaki e preis di entrada ta kambia i ta bira 35 florin”.