Back to Top
Responsive image
E korant di pueblo

Ta pèrmití benta i uso di vürwèrk pero nada di show


December 16, 2020 • 2 minüt pa lesa

Willemstad,– Un notisia tòg poko positivo ta ku ayera promé minister señor Eugene Rhuggenaath a bisa ku ta bai pèrmití benta i uso di vürwèrk, pero lógikamente kosnan lo no bai manera kustumber.

Promé minister a bisa ku tin un tim ku ta wak nos kustumbernan, nos selebrashon di fin di aña etc. E ta bisa ku tin hendenan ta puntra kon sierto aktividatnan ta bai tuma lugá.

Pa loke ta benta di vürwèrk, teniendo kuenta ku e situashon aktual di Covid 19, apesar ku na Hulanda a para esaki kompletamente, gobièrnu di Kòrsou ta pèrmití benta i uso di vürwèrk bou di e siguiente kondishonnan:

USO PARTIKULAR/PERSONAL
Ta pèrmití benta i uso di vürwèrk pa uso partikular/personal
Ta bini ku reglanan spesífiko pa bendedó nan di vürwèrk pa ku benta di vürwèrk.

KOMPANIA I ORGANISASHONNAN
No ta pèrmití uso di vürwèrk riba kareteranan públiko òf riba tereno propio den kuadro di seramentu di aña komo kompania/organisashon.

Kompanianan komersial lástimamente no por duna show di vürwèrk i pagara ya ku esaki ta trese hopi aglomerashon i mester evitá esaki.

Pa loke ta hotèlnan i lugánan di hospedahe, ta pèrmití únikamente tiru di vürwèrk entre 31 di desèmber 2020, 12’or anochi i 1 di yanüari 2021 1’or di mardugá. E kompleho por kumpra vürwèrk pa uso únikamente durante kambio di aña. Esaki mester sosodé riba tereno privá di e lokalidat i solamente pa wéspetnan registrá.

Uso partikular no ta posibel den hotèl, pues e hotèl/apartamentu so por sende vürwèrk pa su wéspetnan segun kondishon stipulá.

Señor Rhuggenaath a splika ku benta di vürwèrk riba 30 i 31 di desèmber despues di 4’or di atardi lo por tuma lugá solamente den forma di ‘take out’ i a base di pedido adelantá i na tur momentu mester sòru di mantené reglanan di higiena i sufisiente distansia sosial.

Promé minister ta hasi un yamada pa nos ta kosiente ku nos ta bai tin un fin di aña otro for di otro, hopi kos tradishonal no ta ser pèrmití, paso no ta pèrmití aglomerashon. Tampoko ta rekomendá pa famianan bini huntu manera kustumber, paso nos mester kuida otro.

Pa loke ta show di pagara, sena di trabou, bailamentu,  bebementu di alkohòl ets, lo mester tuma lugá di otro manera. E ta bisa ku e sa ku ya tin kompanianan i famianan ku ta pensando otro manera pa nan por selebrá, manera entre otro hasiendo uso di medionan sosial pa komuniká ku otro.

Login