Kabul,– E organisashon di Taliban ta moviendo duru i riba un forma violente dor di Afghanistan. For di na momentu Merka i NATO a duna di konosé ku nan lo retirá nan militarnan for di e pais, e grupo Taliban a logra konkistá 65% di Afghanistan.

Segun Union Oropeo, Taliban ta kontrolando 65% di Afghanistan. Na momentu ku Merka i NATO a kuminsá retirá for di e pais e trabou pa Taliban a bira muchu mas fásil. Riba djamars e siudat Pul-e-Khumri a kai den man di Taliban despues ku militar di e gobièrnu di Afghanistan no por a defendé e siudat mas. Aktualmente e Pul-e-Khumri ta e di shete siudat regional ku a kai den kòntròl di Taliban den apénas 1 siman.

Ofisialnan di Nashon Uní tin miedu ku derechi humano den e pais tin chèns di haña sla grandi mirando ku Taliban ya ta kontrolá gran parti dje pais i e grupo ta konosí di kibra ku derechi di hende. Último 20 añanan Nashon Uní tabata invertí basta energia pa stimulá derechi humano den e pais, pero bou di un gobièrnu Taliban nan ta ferwagt ku e energia invertí tabata pòrnada.

Presidente di Afghanistan, Ashraf Ghani, ta hasi un yamada na milisianan regional ku lo ke yuda defendé e gobièrnu si kòntròl. Ademas Ghani a pidi tur residente di Afghanistan pa trata na defendé demokrasia den e pais.

Segun ekspertonan militar, Taliban tin un strategia pa trata na kontrolá e parti nort di Afghanistan i den mesun momentu trata na kontrolá entradanan prinsipal di e frontera riba parti nort, wèst i züd. I asin’aki trata na move pa direkshon di e kapital, Kabul.

Na 1996 Taliban tabata tin kòntròl kaba riba Afghanistan, pero ta despues ku Merka a ataká e pais, Merka mes a disidí na instalá un gobièrnu. Bou di e gobièrnu Taliban habitantenan di Afghanistan mester a biba bou di regla i leinan sumamente estrikto.

Riba nivel internashonal diferente fundashon di derechi humano ta kondená akshon nan di Taliban. Ta asina ku e organisashon ta risibí basta kritiká tokante nan trafikashon di hende, opreshon di hende muhé, violensha kontra di habitantenan di Afghanistan i diskriminashon di persona ku otro kreensia.

Aktualmente 90% di militar di NATO i Merka ya a bandoná Afghanistan.