Back to Top
Responsive image
E korant di pueblo

Te ainda Guus Hiddink no tin balor agregá pa nos selekshon


May 10, 2021 • 4 minüt pa lesa

WILLEMSTAD—E konosido abogado i konosedó di deporte i speshalmente fiel amante di e deporte rei futbòl i un di esnan kende mas ta sigui i tin nos selekshon nashonal di futbòl na pechu, Elden ‘Peppie’ Sulvaran, awe tambe ta kompartí parti di su gran prekupashon pa ku nos selekshon, ku nos fiel lektornan.

Nos próksimo kompromisonan

Un ke otro, na momentu ku falta ménos ku un luna i yegando mañan ta papia di eksaktamente 4 siman, òf tambe 28 dia, pa selekshon di futbòl di Kòrsou ta riba tereno riba djamars dia 8 yüni próksimo na Kòrsou, den wega ku lo ta krusial i importante pa nos riba e ruta pa mundial di futbòl FIFA, Qatar 2022. Esaki ora nos topa selekshon di Guatemala, ku ta trahando duru, entre otro riba diferente refuerso.

Promé ku esaki, por konta di awe na 26 dia, ku Kòrsou primeramente lo topa tambe ku e selekshon di British Virgin Islands, den wega bálido pa e promé buèlta klasifikatorio den Grupo C di Concacaf, riba djasabra dia 5 yüni 2021, den partido ku lo hunga na Guatemala.

‘Peppie’ Sulvaran:

“Laga nos pone bon kla ku irespekto ken ta na kabes di selekshon di futbòl di Kòrsou, e selekshon por konta tur dia  ku nos sosten. Lokual si nos no ta hasi, ta ku nos no ta gaña nos mes. Den seis luna di tempu, e úniko kos ku Hiddink a hasi te ainda, ta oumentá e staf na banda di tereno ku su konosínan.

Pa lokual ta trata refuerso pa riba tereno, pa fortifiká nos onsena nashonal, su logro ta nulo (te ainda).

Sürnam ku 14 refuerso

Kosnan ta otro na Sürnam, kaminda tékniko Dean Gorré, eks hungadó di entre otro Ajax i Feyenoord, ta dirigiendo mes tantu tempu ku Guus Hiddink ta ku nos. Di Novèmber 2020 pa awor, Dean Gorre si, a logra 14 refuerso di nivel haltu te ainda, pa asina hasi ‘Natio’ un selekshon ku pretenshon realístiko pa gana Canada na yüni i presentá nan mes komo kandidato serio pa yega Qatar.

DT Dean Gorre

Gorré, un hóben entrenadó ku dinamismo tin un manera habrí di komuniká ku fanatikada i prensa surinameño i adelantá ta bisa i kompartí kua hungadó e ta bai traha riba dje. E si ya kaba a pega piska grandi, miéntras nos ta piska gengu ketu bai.

Kiper

Gorré a kombensé hungadó di nivel manera e portero Warner Hahn (Anderlecht).

Defensornan

Tambe e la logra trese e bèk sentralnan Ryan Donk di Galatasaray, Shaquille Pinas di ADO i Ramon Leeuwin di AZ. I e lateralnan Damil Dankerlui (FC Groningen), Ridgeciano Haps (Feyenoord) i Kevin Leerdam eks-Feyenoord, awor Inter Miami, ku por hunga bolante tambe.

Bolantenan

Den bolante e la logra Tjaronn Chery eks FC Twente, FC Groningen i ADO, ku awor ta hunga na Israel pa Maccabi Haifa, Diego Biseswar eks Feyenoord i awor kompañero di ekipo di Charlison Benschop na Chipre. Mitchell Donald eks Ajax ku awor ta hunga den divishon máksimo na Turkia pa Erzurumspor.

Delanteronan

Pa su atake tambe Gorré ta bin ku arma pisá. Sheraldo Becker di Union Berlin den Bundesliga, Florian Jozefzoon eks Ajax i PSV ku awor ta militá den Championship Ingles pa Rotherham, ekipo ku a hunga kontra di ekipo di Leandro djasabra pasá.

Tambe e la logra kombensé Mitchell Tevreden, eks Feyenoord i Heerenveen ku awor ta hunga na Saudi-Arabia.

Dean: “Leu for di kla”

Den un par di luna Sürnam a bira faborito huntu ku Canada pa gana nan grupo B. Pero Gorré, ku ta tata di Kenji Gorré di nos selekshon, a anunsiá ku e ta leu fo’i kla i promé ku fin di luna lo anunsiá mas refuerso di nivel, entre otro Gyrano Kerk, delantero rápido i di forsa di FC Utrecht.

Prensa na Sürnam i facebook di SVB

Prensa surinameño i facebook di Surinaamse Voetbalbond, otro for di nos, ta bibu bibu ku entre otro e desaroyonan aki.

Posibel refuersonan pa Kòrsou  

Nos lista di posibel refuerso tambe ta largu, pero Hiddink si no a logra kombensé òf kisas no a hasi esfuerso pa kombensé entre otro e siguiente futbolistanan di nivel.

Defensa

Sherel Floranus (Heerenveen), Giovanni Troupée (FC Utrecht), Tyrell Malacia (Feyenoord), Lutsharel Geertuida (Feyenoord), Armando Obispo (PSV), Tommy St. Jago (FC Utrecht).

Bolante

Kevin Felida (FC Den Bosch), Quinten Timber (FC Utrecht).

Delanteronan

Nigel Robertha (DC United), Jurgen Locadia (FC Cincinnati), Tahith Chong (FC Brugge) i Richairo  Živković (Changchun Yatai).

Soña ku Oraño

Kisas tin ku ta soña irealistikamente ku selekshon ulandes, pero si nos por haña maske ta kuater di nan, huntu ku Room, Bacunanan, Anita, Kuwas, Antonia i eventual Benschop, nos por forma un onsena básiko ku por yega i kompetí den oktagonal. Di otro banda, kos ta bai bira difísil, pa no bisa imposibel.

DT Guus Hiddink…. sèn tira afó ??

E kos ta ku realistikamente Hiddink ta bai hasi 75 aña i ta un hende di edat avansá. E energia ku Gorré tin, Hiddink no tin. Kisas ta tempu pa kuminsá pensa pa buta un entrenadó hóben, banda di dje, ku por ta mas movibel i aksesibel pa kandidatonan pa selekshon, manera tabata e idea ku Hedwiges Maduro. Paso si Hiddink no por trese hungadó pa nos, ta sèn tirá afó.

Informashon na prensa lokal i e #12

Un otro kos tambe, kosnan rondó di selekshon ta morto. Prensa lokal i e number ‘12’, no ta hañando informashon. Durante e lastu weganan, e facebook tabata aktivo un ratu, pero despues a kai den un lòk te awe.

Lanta for soño

Nos tin un bon racha ku selekshon, laga nos mantene i interveni na tempu, pa aworo nos no pèrde saku pèrde kangreu. Nos no por drumi riba e aspektonan aki.

E realidat !

Si pa e weganan ku ta bin na yüni próksimo, Hiddink no logra trese refuerso, e no tin niun balor agregá. Esei ta un realidat. Awor ta hungadó e mester bin kuné.

Nos ta spera sinseramente ku nos ta robes i ku ainda Hiddink lo logra algun di e nòmbernan ariba menshoná pa otro luna, ora nos tin ku enfrentá Virgin Islands, Guatemala i eventualmente Panamá òf Santo Domingu.

Ban harma pa yüni awó

Kuminsá harma pa yüni nos ta ‘UNU’, pa sostené ‘Pantera Negra’ den nos kueba na Brievengat.       



Login