Gráfiko ilustrando averahe di kasonan di infekshon na islanan CAS i BES, por mira un oumento di kaso e último dianan na Kòrsou

WILLEMSTAD – Djabièrnè último, RIVM a publiká su reportahe semanal relashoná ku kasonan di Covid-19 entre islanan CAS i BES. Segun e publikashon, te ku aworakí un total di 8 menor di edat a keda hospitalisá debí na Covid-19 di kual 3 di nan tabata registrá durante e delaster luna.

Segun e reportahe semanal publiká pa RIVM, islanan den Reino Hulandes kolektivamente a eksperensiá un dismunishon di 12 porshento kompará ku siman pasá den kasonan positivo di Covid-19. Miéntras Saba i Statius no a registrá ningun kaso positivo durante e siman tras di lomba, Kòrsou si a eksperensiá oumento den kasonan nobo di Covid-19.

Djaweps último gobièrnu di Kòrsou a tene un relato di dia unda dr. Izzy Gerstenbluth a duna di konosé ku e kantidat di kasonan nobo di Covid-19 ta oumentando. Segun datos di RIVM, 193 persona di kada 100.000 habitante a tèst positivo. Kompará ku dos siman pasá unda 129 persona pa kada 100.000 habitante a tèst positivo.

E oumento aki ta trese preokupashon grandi debí na e oumento di hospitalisashon ku esaki por trese kuné. Sigur despues ku CMC a emití un karta na Ministerio di Salubridat ku ta informá ku personal lokal di CMC ta hopi agotá i lo mester studia e posibilidat pa manda pashèntnan den eksterior pa sigui risibí kuido. Den e publikashon, RIVM ta rekonosé e situashon prekario pa loke ta trata atenshon pa kuido kurativo i e kapasidat di hòspital.  Mas aleu, RIVM a raportá un total di 35 hopsitalisashon bou di pashèntnan di Covid-19. Entre 22 di yüli te ku 13 di sèptèmber 151 persona a keda hospitalisá pa motibu di Covid-19 di kual 5 so tabata kompletamente bakuná i 4 partialmente protehá.  

Te ku aworaki, un total di 30 porshento di personanan menor di edat (12 pa 17 aña) a risibí por lo ménos un shòt di bakuna. For di komienso di e pandemia, un total di 1775 kaso positivo di Covid-19 a keda registrá entre di muchanan bou di 18 aña di edat. Esaki ta konta pa un total di 11.3 porshento di e kasonan total registrá na Kòrsou. Te ku aworaki, RIVM a raportá un total di 8 kaso di hospitalisashon debí na Covid-19 entre muchanan bou di 18 aña di edat. 3 di e kasonan di hospitalisashon a keda registrá den e delaster luna aki.