Método di bakuna basá riba e vírùs kompletu

E modèl di bakuna aki ta usa e téknika di bakunashon pa medio di un vírus kompletu. E método aki ta e asina yama “viral vector vaccins”. E método aki ta usa un vírus ku no tin ningun peliger pa e kurpa humano. Sientífikonan ta programa e vírus “safe” aki ku proteina di e vírus òf bakteria ku ta kontené e malesa. E vírus “safe” ta sirbi komo un Plataforma pa trese e proteina di e vírus peligroso den e kurpa humano, asina e sistema imunológiko por traha antikuerpo kontra di esaki. E téknika aki ta un téknika di bakuna ku por wòrdu produsí relativamente lihé kompará ku e otronan. Bakunanan kontra Covid-19 ku ta hasi uso di e método di “Viral Vector” ta: Sputnik V, the AstraZeneca, Convidecia i e bakuna di Johnson & Johnson.

Bakuna basá riba kódigo genétiko

E método aki ta un ku no ta kontené e vírus òf bakteria, e método aki ta konsistí di un kódigo genétiko ku ta kontené instrukshon pa produsí un proteina spesífiko.

RNA ta kódigo genétiko ku ta duna instrukshon pa nos sélulanan traha proteina. Promé DNA ta wòrdu transformá den “messenger RNA” (mRNA), esaki ta e kódigo genétiko ku ta duna mensahe pa traha proteina spesífiko. Un bakuna di e modèl aki ta kontené mRNA ku instrukshon pa nos kurpa traha proteina spesífiko paresido na un vírus òf bakteria deseá, di e manera aki nos sistema imunológiko por rekonosé e proteinanan aki i traha antikuerpo kontra di e vírus of bakteria.  E bakunanan di Pfizer i Moderna ta basá riba e téknologia di kódigo genétiko.