Tin dos tipo di atake serebral: iskémiko i hemorágiko. E promé ta un blokeo di arteria den serebro i e di dos ta ora un arteria serebral rementá.

PUNDA- Ora ta trata di un ataka serebral, akshon rápido ta sumo importansia. Manera ya ta konosí enfermedatnan kardiobaskular ta e kousa prinsipal di morto na mundu. Pa yuda konsientisá kada un siudadano riba atake di kurason nos a sumarisá kiko e malesa ta enserá, kiko ta e síntomanan i kon ta prevení esaki.

Mundialmente enfermedatnan kardiobaskular ta e kousa prinsipal di morto.Anualmente alrededor di 18.5 mion persona ta fayesé pa motibunan relatá na enfermedat kardiobaskular.

Ataka serebral, kual tambe ta kai bou di e kategoria di enfermedatnan kardiobaskular. Enfermedat kardiobaskular ta un nòmber ku ta usa pa akapará un kantidat grandi di problema di salú relashoná ku kurason i base di sanger. Lo siguiente ta kai bou di enfermedat kardiobaskular: enfermedat koronario, atake serebral i atake di kurason.

Ataka serebral ta un evento médiko grave ku por pone kousá desabilidat i te asta morto si esaki no keda tratá rápidamente. Mirando ku ta trata aki di un di e órganonan mas vital kual e serebro humano, tempu ta un faktor di suma importansia paso e serebro no por sobrebibí largu sin oksigeno sino e ta pèrdè parti di su funshon. Sentro di prevenshon i kontròl di enfermedat na Merka (CDC) ta karga e lema: “tempu pèrdí ta un serebro pèrdí” ora ta trata di ataka serebral.

Segun datos di CDC, na Merka kada 40 sekònde un persona ta sufri di un ataka serebral òf derame serebral. Mientras e datosnan lokal pa ku esaki no ta konosí, mundialmente ta un echo ku e kantidat di personanan ku ta sufri di un ataka serebral ta hopi haltu.

Kiko ta un ataka serebral

Ataka serebral, mihó konosí komo un aksidente serebrobaskular òf derame serebral generalmente ta un redukshon den fluho di sanger ku mester yega e serebro pa duna esaki oksigeno. Esaki ta nifiká ku algu ta blokia ku e sanger por yega na e serebro òf ku un arteria chikí a rementá den e serebro.

Tin dos tipo di ataka serebral: iskémiko i hemorágiko. Mayoria ataka serebral ta iskémiko, kual ta kousá pa un blokeo di e arterianan den serebro dor di pròp di sanger òf depósitonan di vèt. Ora un arteria chikí den e serebro rementá òf sker, esaki ta wòrdu yamá un ataka serebral hemorágiko.

Ademas, tin bia e blokeo iskèmiko ta sosodé solamente pa un pèriodo kòrtiku, generalmente alrededor di 5 minüt máksimo, esaki den sektor médiko ta keda kategorisá komo un (TIA), kual ta para pa un atake iskémiko pasadero òf un mini ataka serebral. Maske e TIA ta ménos severo ku un ataka serebral kompletu, tòg esaki tambe ta keda kategorisá komo un emergensia médiko kual por ta un señal di atvertensia pa un derame serebral den futuro.

Kiko ta pasa den serebro

Durante un atake serebral hemorágiko, sanger ta sali for di e arterianan kual ta kousa preshon ku ta trese daño na e sèlulanan di serebro.

Na momentu ku un arteria keda blokiá durante un atake iskémiko, e sélulanan di serebro no ta risibí oksigeno ni e nutrientenan nesesario. Esaki ta pone ku e sélulanan ta muri denter di un par di minüt.

Síntomanan

Atake serebral mayoria bia ta keda identifiká pa un doló di kabes inmediato i intenso, problemanan di vishon den un òf ámbos wowo, problema ku kanamentu, parálisis òf sintimentu dof den kara i/of man ku pia.

Eskpertonan ta usa e akrónimo FAST, ku ta para pa FACE, ARMS, SPEECH i TIME, pa deskribí kiko mester hasi den kaso di un atake serebral. Primeramente, mester pidi un persona pa hari saka djente, di e manera aki por opservá si un banda di kara ta kai òf paralisá. Despues ta pidi un persona pa hisa ambos man pa opservá si esaki ta posibel òf si un man ta keda abou inkonsientemente. Na di tres lugá ta puntra un persona pa bisa su nòmber òf ripití un frase pa asina por verifiká ku un persona no tin difikultat pa papia. Si den un di e stapnan menshoná un persona no por kompletá e lokual ku e mester hasi, mesora mester buska ayudo médiko mirando ku aki por trata di un atake serebral.

Tratamentu

Na momentu ku un persona sufri di un atake serebral e tratamentu i rekuperashon ta dependé di e gravedat di e ataka i e rapides ku e persona a risibí atenshon médiko. Atakanan ménos grave manera un TIA, tin ménos impakto permanente kompará ku un ataka kompletu. Ademas, e lokalidat den serebro ku e ataka tuma lugá tamba ta di influensia pa loke ta trata e efektonan. Por ehèmpel, un ataka ku tuma lugá den e region kaminda un persona tin e abilidat pa papia, ta pone ku despues e mester bolbe siña papia dinobo. Meskos si e ataka tuma lugá na region por ehèmpel di moveshon di sea man òf pia. Pa e motibu aki, e periodo di revalidashon despues di un ataka serebral ta sumamente largu, paso mester siña e serebro dinobo. Por último, ménos oksigeno un persona pèrdè, pues mas lihé e risibí tratamentu médiko, ménos chèns tin ku e parti di serebro ta severamente afektá.

Prevenshon

Mésun faktornan ku ta protehá kontra problemanan di kurason ta protehá kontra un atake serebral tambe, mirando ku esaki tambe ta un enfermedat kardiobaskular. Ta trata aki di biba salú, 30 minüt di ehersisio diario, no huma, redusí strès i drumi sufisiente.