KONTENTU—Durante un podcast di Hustisia Seguridat i Abo, eksperto funshonario na Departamentu pa Salu Hubenil sra. Bernice Pop a duna konseho fuerte pa tene mucha distanshá for di zonido haltu. Esaki e la duna di konosé durante su kombersashon ku anfitrion Dikmar Oleana i Raiza Martis.

Segun Pop, si opta pa bai ku mucha wak marchanan di karnaval, mester protehá nan oido. Pero anke ku tin tur ekipo adekuá pa protehá oido, e funshonario na Servisio di Salubridat Públiko ta urgí mayornan pa tene un distansha for di spiker. Pasobra anke e orea ta bon protehá, e zonido haltu por okashoná daño tòg na oido di e mucha. E zonido por penetrá tòg i por tin konsekuensia ku e yu por keda tende malu despues.

E Departamentu di Salu Hubenil ta notando ku tin mayornan no ta tene kuenta ku e menasa serio di yunan keda afektá pa zonido i tòg ta bai karnaval ku e muchanan sin protekshon. Segun sra. Pop, aña pasá tabata notabel ku tabatin hopi mayor a hiba nan yunan wak karnaval sin duna protekshon. Tabata hasta situashon unda tabatin beibinan kant’i kaminda di ménos di 3 siman soportando e zonido haltu den kaya. E momento ei ta hopi difísil pa e funshonario di GMN pa aserka e mayor pa duna konseho. Pop a splika ku mester hasi esaki ku koutela. Pero alabes e la duna di konosé tambe ku tin hopi mayor ta skucha i tuma medidanan nesesario. Nan apliká e sistema di kana den formashon, esta den diferente tim pa opservá i pone atenshon na muchanan ku no ta protehá. Esei ta posibel pasobra nan ta risibi e kursonan i entrenamentu nesesario kon pa hasi esaki.