Back to Top
Responsive image
E korant di pueblo

Tereno di erfpacht na Kenepa destiná pa konstrukshon durante 2021


January 4, 2021 • 3 minüt pa lesa

Playa Kenepa

Punda— Área di Kenepa durante 2021 ta bai bira un tópiko serio di debate den komunidat i sírkulonan polítiko. Pa 2021, un grupo di invershonista ulandes i lokal lo bai konstruí un proyekto di bibienda i di estadia turístiko. Vigilante a tuma kontakto ku minister Zita Leito kende kisas pa motibunan familiar no a duna un reakshon ainda.

Pero e tereno na Kenepa tin su historial i intentonan pa konstruí for di 2007.  Un kompania C2S Real Estate, registrá na Kámara di Komersio na Kòrsou, a fungi komo intermediario pa derechi di erfpacht riba e tereno en kestion di gobièrnu na Kenepa. Un suma di 5 mion florin tabata envolví. Originalmente e kompania tabatin un otro nòmber, dia ku a kambia nòmber a keda riba mesun number di registro. Ta trata di mesun tereno diskutí fo’i 2008 den Kolegio di Diputado i Konseho Insular di Kòrsou. E tereno ta keda ubika skùin patras di playa di Kenepa. Despues di 13 aña, mas informashon ta bin sali dilanti. E traspaso di e derechinan di e tereno aki, a tuma lugá riba un sistema bastante kuestionabel, unda derechinan di erfpacht a wòrdu traspasá sin e outorisashon nesesario di gobièrnu di Kòrsou, miéntras historia dje kompania mes tin un trayekto bastante largu.  E kompania, promé di a kambia nòmber, na 2007 pa 2008 a risibí derechi di opshon riba dos pida tereno grandi na Kòrsou. Unu na Jan Noorduynweg i unu mas na e área entre Kenepa Grandi i Kenepa Chikí.  Historia dje kompania en kestion ta mustra ku riba 4 di mei 2007 un persona di fam F. a risibí opshon riba e tereno na Kenepa. Via di kantor di notario, a laga instituí diferente SPF  i despues BV pa aloká e struktura di e opshonnan.

Riba 14 di ougùstùs 2007, a dos SPF nan a ofisialisá e petishonnan di e opshonnan. Ta trata di SPF Playa Abou i SPF Playa Blou, kual siguiente dia riba 15 di ougùstùs 2007 ofishalmente a keda instituí dor di F. huntu ku un otro persona mas di fam W. Playa Abou i Playa Blou despues ta bira dos entidat komersial restringí ku fasilidat fiskal den forma di un BV.. Seguidamente riba 15 di ougùstùs 2007, un otro SPF, Nobrand ta risibí 1/10 parti di derechi di establesimentu den SPF Playa Abou.  Riba 27 di sèptèmber, e komersiante F. ta lanta un Real Estate kompania ku despues a bin kambia di nòmber i bira C2S Real Estate. E kompania tabata registrá na Winkelcentrum Colon Unidat 1. A uza un kuenta di tersera parti dje ofisina di Notario pa hasi e transakshonnan finansiero kual tabata na nòmber di e kompania di Real Estate. C2S ta bin haña diferente adrès despues i kambia tambe di diferente direktor. Despues di a entrega  e opshonnan riba erfpacht na Playa Abou i Playa Blou a wòrdu ofisialisá. Na 27 di Febrüari 2008 e kompania First Columbus Trust ta atkerí 2/3 parti riba derechi di establesimentu den SPF Playa Abou. Siguiente dia riba 28 di Febrüari, SPF Nobrand ta risibí sobra 9/10 riba derechi di establesimentu den SPF Playa Abou.

Entre 5 di mart 2008 pa 12 di mart 2008, un transakshon di Nafl. 1.000.000,- ta tuma lugá pa traspasá derechinan di opshon i erfpacht na un kompania Nesser Holding. Den e transakshonnan aki tabatin un seri di SPF i kompanianan na Aruba envolví entre nan Corplease AVV. Riba 10 mart, un di dos transakshon ta tuma, unda SPF Nobrand ta traspasá tur derechi di establesimentu di SPF Playa Abou na CorpLease pa Nafl. 4.000.000,-. Entretantu e kompania di Real Estate ku e hòmber Lionel F. a laga lanta, riba 19 di yüni 2009 a bin kambia nòmber pa C2S Real Estate. E nòmber dje kompania ta kambia pero ta keda mesun kompania registrá bou di su numerashon original KvK 97754. Di e manera aki, e nòmber original di e Real Estate no por wòrdu relashoná ku e transakshonnan mionario unda e derechinan riba tereno na Kenepa tabata bálido. A uza e kuenta di tersera parti registrá na kantor di notario pa e transakshonnan mionario. Komo komishon, un suma di Nalf. 500.000,- florin a sirkulá pa intermediashon na Kenepa i na Jan Noorduynweg un suma di Nafl.250.000,- Riba 23 di yüni 2008, e dama di fam C. a asumí e posishon di direktor pa e kompania C2S Real Estate. 12 aña despues, te ku desèmber 2020, C2S Real Estate ta bou di nòmber di un komersiante chines nase na Guandong, Xiaohai F. Entretantu e dos kompanianan Playa Abou i Playa Blou a wòrdu deskontinuá foi registro di Kámara di Komersio na mei 2017.

Pero aparte di traspaso ilegal dor di pagonan pa derechi di erfpacht, tin desaroyo positivo pa 2021. Un grupo di invershonista internashonal i lokal ta bai konstruí na e tereno.

Login