Back to Top
Vigilante banner image

Tin 14.200 ilegal na Kòrsou


March 23, 2023 • 2 minüt pa lesa

Tin entre 8 pa 9 mil persona indokumentá habitá aki na Kòrsou.

WILLEMSTAD – Segun sifranan di yüni aña pasá dje e organisashon internashonal di migrashon i OM tin 14.200 persona indokumentá na Kòrsou. E sifranan ku gobièrnu lokal mes tin aktualmente ta di añanan 2019 i 2020, indikando ku tin entre 8 pa 9 mil persona indokumentá habitá aki na Kòrsou. Asina Minister di Hustisia Shalten Hato a splika Parlamento pa medio di Presidente Charetti America-Francisca, riba preguntanan ku Parlamentario Maria Nita a hasi na 2021.

Nita tabata ke sa kiko e minister di Hustisia ta opiná di e situashon di indokumentadionan aki na Kòrsou i kon e Minister ta mira e posibilidat pa adaptá ‘Integrashon Responsabel’ ku e título ‘Brooks Tower Integrashon Responsabel pero Real’ mas atraktivo i ehersisionan pa atendé e situashon di indokumentadonan ku a drenta legal.

Minister Hato: “Na 2008 Minister di Hustisia a start un mega proyekto pa optimalisá e kadena migratorio den Antia-Hulandes. Parti di e proyekto akí tabata e trayekto Brooks Tower, kaminda a duna indokumentadonan e oportunidat pa hasi un petishon, pa motibu ku promé ku esaki gobièrnu su prosesonan pa hasi un petishon di estadia tabatin defisiensia. Ku otro palabra, dor ku gobièrnu no tabatin su prosesonan na òrdu, ela drecha su proseso promé i despues duna e indokumentadonan chèns pa nan tambe drecha nan situashon legal.”

Segun Hato, Integrashon Responsabel na otro banda tin un otro meta. E meta ta pa duna tur esnan ku ta kumpli ku tur rekisito, e oportunidat pa entregá un petishon sin mester sali for di pais. “Kemen e kuadro di e dos proyektonan ta diferente i no por kompará nan ku otro. Gobièrnu kontinuamente ta evaluá maneranan pa mehorá su prosesonan.”

Riba e pregunta di Nita si e Minister ta di akuerdo ku su inisiativa pa kambio di proyekto Brooks Tower Integrashon Responsabel pero Real ta trese fondo pa kubri seguronan sosial i médiko, i tambe kontribuí ku impuesto derivá for di labor. Hato no ta di akuerdo ku e konklushon akí. “No a hasi e investigashonnan pa por konkluí esei sin mas.” Segun Nita durante Brooks Tower falta di kòntròl i kumplimentu ku pèrmitnan a hasi ku e proyekto na final tòg no a sirbi e meta inisial, ku tabata pa kombatí ilegalidat den Antia. P’esei ela puntra si Kòrsou lo por a karga e proyekto akí kumpliendo ku dokumentashon i kòntròl pa e indokumentadonan. Hato a ripití riba e pregunta akí ku e dos proyektonan ta diferente i no por kompará nan ku otro. “E proyekto Brooks Tower a terminá algun aña pasá kaba.”

Nita tabata ke sa tambe kon lo ekipá e servisio di imigrashon pa por atendé e proseso akí. Hato: “Gobièrnu ta hasiendo tur loke ta na su alkanse pa ekipá e departamento di Imigrashon sea ku personal i material, pa por kumpli ku nan tarea. Realidat aktual ta ku tin eskases di personal, ku ta pone ku e temporada di espera pa petishonnan entregá na TO ta (muchu) largu. Mi ta kanando diferente trayekto pa purba aliviá esaki mas lihé ku ta posibel.”

Login