WILLEMSTAD,– Djaweps 20 di mei 2021 alrededor di 18.45’or, unidat di UST durante nan patruya a señalá na krusada Venezuelaweg/ Brazilweg un vehíkulo sin plachi di number dilanti i bentananan di e outo tabata skur di plak.

Na momentu ku e shofùr a nota e unidat polisial, e la subi El Salvadorweg, hisa velosidat i kore bai. Polis a kuminsá ku un persekushon i a duna e shofùr òrdu pa para. Durante di e persekushon shofùr di e vehíkulo a benta un opheto pretu riba tereno di un kas na Elminaweg. Riba Kaya Frank Curiel e shofùr a para e vehíkulo i polis a kuminsá ku un kontròl. Un otro unidat di UST a bai Elminaweg i a haña i konfiská un arma di kandela ku un ratu promé a keda tirá for di e vehíkulo ku polis tabata persiguí. Na e sitio a detené e hòmber G.G.A.O. nasé na Kòrsou di 33 aña di edat, pa violashon di lei di arma di kandela. A presente dilanti un fiskal ouksiliar ku a ordená su enkarselamentu pendiente di mas investigashon.