WILLEMSTAD,—-For di algun dia tras di lomba, trabounan a kuminsá den Curaçao Festival Center, pa loke ta trata e parti di limpiesa.

T’asina ku nan a kuminsá limpia parti paden di Festival Center. E limpiesa ta den man di e manehadó nobo di e sitio menshoná. Esaki ta nifiká ku, tur kos ta práktikamente rònt entre e manehadó nobo i tambe Direktiva di A.M.A.K. paso si nan no ta rònt, ta imposibel ku trabounan por a kuminsá den Curaçao festival Center.

Mas aleu Vigilante Farándula a komprendé ku, ya e portanan nobo ta kla i ku ta kestion di algun siman, e portanan nobo ta bai keda instalá i tambe fuente a bisa ku, e palmanan i tambe palunan di koko, tambe ta rumbo pa Curaçao festival Center.

Otro informashon ku Vigilante Farándula ta disponé di dje ta bisa ku, otro siman djasabra, esta awe na un siman,ku ta dia 12 di yüni, lo bai tin e promo fiesta di ámbito di Kòmbèk den e sitio menshoná. Kaminda ku lo bai tin kuater agrupashon musikal ku lo bai presentá. Vigilante Farándula a drenta den kontakto ku e promotor en kuestion, i el a duna di konosé ku, “Mi ke ta kòrtiku, te ainda tur kos ta mes un kos, esta ku otro siman e fiesta lo bai tuma lugá, si dado kaso bin kambio den esaki, mi mes lo ponebu na altura”.