Willemstad – Programa pa Desaroyo di Rif ta kontinuá. Awor ta toka turno na e proyekto sumamente importante pa drecha henter e sistema di riolering den e área. Trabounan di preparashon a kuminsá for di 1 di mart 2021.

E trabounan ta konsistí di pone un sistema di tuberia di preshon (‘persleiding’) nobo i moderno ku lo konektá esaki ku un sistema di pòmp nobo pa e área ku e planta di purifikashon di awa na Klein Hofje. Meta di esaki ta pa por kolekshoná tur awa di riol i manda esaki pa purifikashon. Asina por hasi uso di esaki pa otro metanan, entre nan agrario.

Aliansa Civil Roadworks ta e kontratista enkargá ku e proyekto aki, bou di supervishon di Servisio pa Obra Públiko (OW). Nan lo tin un durashon di 1 aña i trabounan lo tuma lugá for di Pater Euwensweg na altura di SVB via Helmin Wiels Boulevard te na e di dos rotònde pasando e entrada wèst di Sambil. Den e promé fase, lo traha kantu di kaminda pa pone tuberia na parti nort di e kaya. E parti aki lo no tin efekto pa outomobilistanan. E trabounan aki ta kuminsa den mart i lo dura 2 siman.

Banda di esaki, ta kuminsa tambe ku e trabounan di renovashon di e sistema di riolering for di Otrobanda for di SVB te ku Coney Island. Esaki ta planiá pa kuminsa na final di mart i lo tin efekto riba e tráfiko riba Pater Euwensweg. Lo desviá tráfiko kaminda ta nesesario. OW lo anunsiá esakinan debidamente segun tempu ta yega. Tambe lo perkurá pa minimalisá e molèster ku e trabounan lo por trese pa tur hende den e área, i esnan ku ta usa e karetera.

Esaki ta un paso históriko debí na e echo ku porfin ta atendé ku e awa sushi, ku normalmente tabata basha na sierto okashon den e parke di palu di mangel na rif. Esaki mirando ku e sistema tabata unu bieu. Pues awor, despues ku finalisá e proyekto aki, porfin lo no tin awa sushi mas den e parke di palu di mangel. Aktualmente, ta trahando den e parke i tabata kolekshoná e awa sushi den un parti pa limitá ku e ta sigui afektá e parke. Awor lo tin un solushon duradero.

Minister Jesus-Leito ta satisfecho ku e proyekto aki porfin por kuminsá. Esaki tambe ta parti di e programa pa desaroyo di nos rif. Resientemente, a firma tur e dokumentonan nesesario pa duna inisio ofisial na e proyekto. E proyekto aki ta e último di e trabounan di infrastruktura ku ta drenta ehekushon awor.