PISKADERA – awe den oranan di mainta trempan empleadonan di Betèsda a pone trabou abou pa motibu ku djabièrnè último gerensia a duna algun trahadónan un karta ku ta proponé algun kondishon ku e empleadonan mester bai di akuerdo kuné i entrega nan retiru.

Den e karta ku e trahadónan a risibí djabièrnè último, genersia di Kas di Kuido Betèsda a splika ku nan tinku hasi un redukshon di personal. E redukshon di personal ta referí na kuarter (4) empleado den departamentu di Mantenshon ku mester aseptá e proposishon di Betèsda i entrega nan retiru pa promé di yüli. Gerensia a duna e empleadonan te ku 25 yüni pa aseptá e proposishon. Tambe gerensia a proponé pa dos empleado ku ta traha 8 ora pa dia, baha nan oranan pa 4 ora pa dia.

E trahadonan no ta bai di akuerdo ku e proposishon i ta pidi pa gerensia di Betèsda bini ku un mihó proposishon. Te ku ora esaki wòrdu hasí, tur trahadó lo kontinuá ku e welga. Na e momentunan aki gerensia di Betèsda ta den reunion pa asina tuma un desishon riba esaki. Mas detayes den edishon matutino di Vigilante.