E bòrchi ta bisa “ Nos a traha duru e luna aki, MinFin nos ke nos plaka awor”.

WILLEMSTAD—Ayera trahadónan di Klínika Capriles a reuní pa asina bai wèlgá dilanti di porta di Minister di Finansiá dor ku nan no a risibí nan pago. Den oranan di mainta trahadónan a reuní ku nan sindikato pa asina saka afó ki ora nan lo a bai risibí nan salario. Miéntras na despacho di Minister di Finansiá tabata tin un reunion entre e Minister di Finansiá, Minister di Salubridat , Minister di Hustisia i tambe Gerensia di Klínika Capriles.

Señor Bremer ta splika ku for di siman pasá ontvanger a pone beslag riba e sèn di Klínika Capriles, dor di pago nan ku mester a tuma lugá di belasting. Na Gerensia su turno a informá ku nan lo bai tin un tiki problema na paga trahadó riba e djabièrnè pero ku nan lo paga nan e or’ei riba e fecha stipulá ku ta dia 25. Señor Bremer a akudí na Gerensia pa asina wak kiko a pasa ku e salario di e trahadónan esaki a duna di konosé ku nan lo no por paga e trahadónan ainda. Ademas ku Minister di finansa a manda pidi pa wak sifranan den atministrashon nan promé ku e tuma un desishon di kita e beslag di moda ku e trahadónan por a kobra. Dor di niun resultado trahadónan a disidí na bai porta di Minister di Finansa pa asina e duna kara. Na momentu ku e trahadónan a yega e sitio Minister di Finansa no tabata tei segun señor Bremer a splika.

Minister di Enseñansa, Siensia, Kultura i Deporte Sithree “Cey” van Heydoorn na su turno ku tabata den besindario a disidí na para i duna kara na e trahadónan aki aunke esei no ta su kartera. Segun Minister Van Heydoorn ta splika, tin un problema ku tarifa kaminda Klinika Capriles ta bisa ku lokual ku SVB ta paga no ta sufisiente. Pero Klinika Capriles no ta kumpliendo ku pagonan di belasting ta p’esei a pone beslag na fondo. Minister di Finansa ta trahando ku BAB pa asina regla esaki i den oranan di atardi desishon lo kai pa asina trahadónan kobra nan salario komo debe ser. Minister Van Heydoorn a splika tambe ku komo Gobièrnu nan tin tarea di wak si enbèrdat e sèn no ta yega den Klínika Capriles. Algun ora despues, Minister di Finansia a duna di konosé via di ret sosial ku e a laga nan kita e beslag na Klínika Capriles i ku trahadónan por kobra nan salario fin di luna, esta ku awe e sen lo pasa.