Na e momentu aki e kompania ta den espera pa risibí 5 konvoi nobo pa sigui kontinuá ku nan trayekto pa drecha transporte públiko.

Buena Vista,– Na emomentunan aki ta konosí ku alrededor di 1900 studiante ta risibí servisio di transporte eskolar tur mainta. Aunke transporte eskolar ta wòrdu mirá komo un servisio sosial, tin sufisiente indikashon ku e servisio aki mester wòrdu habrí riba un forma ku tur studiante den komunidat por hasi uso di e servisionan aki.

Segun nos leinan, promé ku un studiante bini na remarke pa hasi uso di transporte eskolar, mester hasi un investigashon riba e entrada di e mayornan. Akaso e entrada di e mayornan ta bou di e drèmpel stipulá den lei, e orei e studiante ta bini na remarke pa por riibí transporte eskolar suspidiá dor di gobièrnu.

Ofresiende e derechi pa studiantenan hasi uso di transporte públiko pa yega skol ta un moveshon korekto, pero tin sufisiente indikashon ku transporte eskolar ofresé pa tur nivel di komunidat tin diferente ventaha. No solamente nos tráfiko lo keda alivá den oranan di mainta i mèrdia, pero mayornan lo no mester strès tantu den tráfiko tur mainta pa yega skol i e studiantenan ku hasi uso di transporte eskolar lo madurá muchu mas lihé.

Segun John Cijntje, direktor di ABC Busbedrijf, si habri e merkado di transporte eskolar, esaki ta nifiká ku mester kuminsá invertí den nos transporte públiko. Transporte eskolar riba su turno lo alivá mayornan ku tur mainta mester kore un ruta ilógiko tur mainta i mas aleu e studiantenan lo madurá muchu mas lihé debí ku nan tin un responsabilidat pa yega skol na tempu tur mainta.

Durante un reunion públiko ku parlamento representantenan di ABC Bubedrijf a indiká ku si transporte eskolar ta bon organisá i no ta wòrdu solamnte ofresé pa e nivel sosial, tráfiko lo move meskos ku den temporada di fakansi. Na e momentunan aki tin sufisiente indikashon ku tráfiko ta mal pegá den oranan di mainta debí na e orario di skol, pero esaki por wòrdu aliviá si transporte eskolar ta bon organisá.

Na fin di mart gerensia di ABC Busbedrijf a firma un akuerdo di ministerio di OWCS pa kordiná e trabounan di transporte eskolar, kaminda alrededor di 100 shofùr ta asosiá kun’é. E akuerdo ta inkluí tareanan di ABC, e presupuesto disponibel i reglanan di bon gobernashon pa uzo di e presupuesto.

Pa habri e transporte eskolar pa tur nivel di komunidat Cijntje a indiká ku ministerio di OWCS mester kuminsá e trayekto pa adaptá e lei ku ta ofresé transporte eskolar. “E ministerio ta na altura di e opshon aki “ e direktor di ABC Busbedrijf a indiká.

Den sala di parlamento na 2022 e kompania a duna un presentashon kaminda abase di nan data nan por spar gobièrnu alrededor di 1.6 mion florin. Na 2022 gobièrnu tabata invertí 4.6 mion florin pa transportá 1915 studiante tur aña, pero segun e konstrukshon ideal ku ABC Busbedrijf produsí  e kompania a diskubrí ku untiki adaptashon den e sistema di transporte eskolar, nan por spar e kaha di gobièrnu entre 700 mil florin pa 1.6 mion florin.