WILLEMSTAD— Un grupo  grandi di outoridatnan envolví den e investigashon di e desaparesido Mike Venema ayera den oranan di mainta trempan bou di ouspisio di un Hues komisario i tambe un Fiskal di Ministerio Públiko a tene entrada hudisial na tres adrès unda a detené tres sospechoso mas.

Ayera den oranan di mainta trempan e tim di aresto riba petishon di reshèrshinan  di homisidio i tambe un kantidat di reshèrshinan Ulandes Oropeo a tene tres entrada hudisial unda a detené tres sospechoso kual tabata trata di dos hòmber i un hende muhé.  Tabata den oranan di mainta trempan ku e tim di aresto a bai primeramente na un kompartimentu di kamber ku ta keda den e bario di Janboos na unda a drenta pa asina por a detené un hòmber sospecha di ta envolví den e desaparishon di e hòmber Mike Venema. Na e adrès na Janboos aki a detené un sospechoso di 26 aña pa despues mesora a kuminsá ku un listramentu pisa den e bibienda. A listra asta den e vehíkulonan ku tin stashoná den e kurá di kas. Durante di e investigashon den e kas a bin topa ku un arma di kandela di e marka Glock i tambe bala pa esaki.  A konfiská tambe un kantidat di artíkulo ku por ta di importansha pa ku e investigashon. Na e di dos adrès ku ta keda den Kaya Joshua reshèrshinan a drenta i einan a detené un dama di 33 aña. Na e kas aki tambe a tuma tempu pa listra pa nan final a konfiská artíkulonan bai kuné. Por último e tim di aresto a drenta den un flèt na Kaya Jose Anthonia i a detené un hòmber di 22 aña. Te trio aki ta wòrdu sospecha di sa mas di e desaparishon di e hòmber Mike Venema kual despues di un aña a bin hañ’é den su pikòp den fondo di laman na Shut pa ta mas eksakto dia 5 di yüli 2019. . Pa e investigashon aki ya tabatin 2 dama detené kual a wòrdu detené na Hulanda. E dos sospechosonan, un dama di 26 bibá na Rotterdam i un dama di 24 aña di edat bibá na Zwijndrecht na e momentu akí ta detené ainda. E sospechoso di 26 aña di edat a presentá dilanti wes komisario na Kòrsou kende a prolongá su detenshon. E sospechoso di 24 aña di edat lo mester presentá e siman aki dilanti un wes komisario.  E sinku sospechosonan aki ta wòrdu sospecha di sa mas di  Mike, di 53 aña, ku na momentu di su desaparishon, tabata biba den un apartamentu na Anasaweg, Kòrsou,

pero promé ku e la disparsé e tabata keda den un kas na Jan Sofat (resort). Despues di un investigashon ekstenso polis ta suponé ku ta trata di un krímen. Despues di konsulta ku outoridatnan na Kòrsou a disidí ku lo hiba un investigashon konhunto.  

Investigashon ekstenso                  

E detenshon ta resultado di un investigashon a largo plaso den estrecho kolaborashon entre polis di Kòrsou i di Hulanda. E kaso ainda ta den pleno investigashon.  

Kobertura den prensa               

Pa medio di e programanan di búskeda Team West, Opsporing Verzocht i retnan sosial a pidi atenshon pa e kaso akí. Foundation Peter R. de Vries a pone tambe un rekompensa na disposishon den e kaso akí.   E kobertura di prensa ekstenso di Foundation Peter R. de Vries a resultá di ta hopi balioso p’è investigashon.   Despues di e yamadanan akí polis a haña diferente tep mashá balioso. Polis ta traha frekuentemente kue misoranan nashonal i regional riba tereno di komunikashon di investigashon. Asina nos ta logra resolvé ku regularidat kasonan ku yudansa di tep.