Despues di un persekushon estilo “Fast and Furious”, detenshon a bin kai na altura di Heintje Kool

NIEUWE HAVEN—Tres hòmber hóben, kende a bai hòrta tayer di outo pa yuda un wela paga Aqualectra 3 mil florin na debe, a skucha nan veredikto den korte djabièrnè. E ladronisia a resultá den un persekushon polisial ku kousa polis herida unu di nan ku bala.

Tabata djaluna 6 di febrüari 2023, alrededor di 04.04’or di mardugá, sentral di Polis a risibí un notifikashon ku tin un ladronisia di piesa for di vehíkulo ta tumando lugá na haf di piskadó na Caracasbaai.  Mesora a dirigí un unidat na e sitio. E unidat ku a yega na e sitio a sorprendé tres sospechoso nèt na momentu ku nan tabata kometé nan akto.

Na momento ku polis a sorprendé e sospechosonan, nan a hui den un Kia Picanto maron i despues a kuminsá un persekushon tras di e sospechosonan. Durante di e rekorido estilo “fast and furious”  na vários okashon a ninga òrdu di polis pa para i nan tabata tira ophetonan ku nan a kaba di kita for di e vehíkulo riba kaya entre nan 3 tayer di outo ku nan rim.  Polis mester a hasi uso di su arma reglamentario pa trata di para e vehíkulo . Na altura di un establesimentu ku ta bende material pa konstrukshon riba Schottegatweg West esta Japan NV,  polis a logra para e vehíkulo despues ku esaki a kore den skual bai dal.

Na e sitio a detené e sospechosonan. Ta trata di: N.A.S., di 20 aña di edat, E.C.R., 20 aña di edat i J.G.M., di 21 aña di edat, tur tres nasé na Kòrsou.  Durante investigashon a bin tuma nota ku un di e sospechosonan tabatin herida di bala na altura di su pia i mesora a keda transportá pa CMC na unda e la haña tratamentu médiko pa despues a keda transportá pa warda di reshèrshi. Ta trata di E.C.R.. Despues a tene tres entrada hudisial na Gilbraltar, Sto. Domingoweg i Blanquillaweg. Polis a haña i konfiská artíkulonan ku ta di importansia pa e investigashon. A presentá e sospechosonan dilanti un fiskal ouksiliar ku despues di interogashon a ordená nan enkarselamentu.

Ayera korte a trata e kaso unda N.A.S huntu ku J.G.M. a risibí mesun kastigu. Nan a risibí 120 ora di trabou kitando 48 ora pa lokual ya nan a sinta den prizon pa 24 dia. Ámbos ta risibí 3 luna di kastigu kondishonal pa un tempu di prueba di 3 aña.

Pe e otro akusado E.C.R., wes Carmelia a haña e la sinta sufisiente kaba i tabata enkarselá ainda  na Sentro di Detenshon i Korekshon Kòrsou. Ayera e tabatin mag di bai kas mas atardi. Esei ta nifiká e la risibí un kastigu di 180 dia kual 71 ta kondishonal. E ta keda ku 109 kologando riba su kabes ku 3 aña tempu di prueba.