Den e edifisio tur hende ta sinta den un sala grandi pa traha pues tur hende ta mira otro den e call center.

Willemstad,- Rick van der Pluim, Kabesante di TUI Dutch Caribbean i Sürnam despues a splika prensa ayera ku despues di mas o ménos 18 luna di trabou, Kòrsou for di 1 novèmber último por broma ku un presioso edifisio nobo riba Schottegatweg ku ta bai sirbi komo ofisina prinsipal di TUI  Dutch Caribbean kaminda alrededor di 100 trahadó lo ta presente pa bende ticket i duna otro servisionan na  e klientenan di e kompania. 

El a splika ku a duna hopi atenshon pa e edifisio a bira unu duradero i un sitio plasentero i konfortabel pa traha.

Ademas e ta trahá di un forma transparente i ta bai spar hopi koriente. Loke ta has’é úniko na Kòrsou.

Rick van der Pluim, Kabesante di TUI Dutch Caribbean i Sürnam a bisa: “Nos ta hopi orguyoso ku nos edifisio nobo. Kòrsou tin un lugá importante den futuro di TUI i e ofisina aki ta resultado di esei.

E ta un dushi lugá pa bo traha i ya mi ta mira kon e trahadónan ta gosa i ta hopi kontentu.

No solamente nos por ekspandé e edifisio fásilmente despues pero e ta trahá tambe di un forma duradero . 

“Nos no por a keda warda mas pa yama nos klientenan bon bini una bes ku e edifisio ta kompletamente kla. Durante di e konstrukshon nos a dediká hopi atenshon pa e edifisio bira unu duradero i ku ta spar koriente, p’esei nos a traha segun e reglanan internashonal di mas moderno teniendo na kuenta tambe ku e sistema di LED. No solamente nos a tene kuenta ku uso di material duradero i e sistema solar di riba dak, pero nos a pone hopi atenshon tambe na un klima di trabou saludabel i konfortabel pa nos empleadonan. E sistema konstruí rondó di e edifisio ta sòru pa un sombra permanente. Dor di un estudio di e situashon di solo ta práktikamente imposibel pa e solo kai riba e glasnan di e edifisio, loke ta trese kuné ku nos lo bai usa ménos èrko. Riba e dak tin 164 zonnepaneel pone di un sistema mas efisiente i moderno. Esakinan pa gran parti ta sòru pa nos spar koriente i ta perkurá pa e parti paden di e edifisio no bira kayente. E sistema ku nos a usa aki ta sòru pa e airu kayente djafó no drenta paden. E parti pafó di e edifisio ta traha ku paneel pre-fabriká isolá ku un kapa di fèrf speshal.                                       

E murayanan paden tambe ta dòbel pa mas efisiensia i e plafònnan tambe ta traha ku paneelnan  ku ta dèmpel e sonido.  E edifisio ademas ta traha di un forma ku bo ta haña hopi klaridat djafó i  dor di esaki bo no mester usa hopi lus eléktriko. E iluminashon ta kasi meskos ku e klaridat di den dia i dor di esei e empleadonan ta sinti nan kurpa fresku i fit henter dia. E lusnan ta avisá ora tin hende ta move ei banda. Si por ehèmpel no tik ningun hende den besindario trahando nan ta paga outomátikamente. E sistema di fria e sirkulashon parti paden di e edifisio ta un di e teknologianan di mas moderno  riba e tereno aki i hopi efisiente. Esei ta sòru pa e lugá ta konfortabel pa esnan ku ta

Eiden.  E sistema mes ta sòru pa bo sinti bo konfortabel i fresku. E edifisio tin sensornan CO2 i si esakinan pasa nan límite outomátikamente airu fresku ta drenta den e parti konserní. Ademas di   esei nan ta usa Energy Recovery Ventilators (ERVs) den e sistema di ventilashon loke ta sòru pa un efisiensia di energia.

Pa loke ta material tambe konsientemente a usa material duradero. A usa konstrukshon di staal mas tantu ku ta posibel na lugá di betòn. Esei ta subi e sirkulashon i baha e CO-2 fotoprint i e edifisio.   Uso di staal a pone tambe ku a bini solamente tres pilá parti paden di e edifisio.  Nan a traha ku material di konstrukshon resiklable.

Hopi di e mobilario ku tin awor aki kaba manera stul ets. ta bai keda wòrdu usá. E kombinashon di e kapasidat isolá, e parti solar, e efisiensia di energia, e uso konfortabel di eskoho di material ta algu úniko pa Kòrsou. E ta fofo i fresku. Tin hopi klaridat djafó i tur 63 lugá pa  traha tin bista pafó. E lugánan pa traha den kantor tur tin lèsenar ku stul ku bo por stèl na bo gemak. Dor di e sistema di plafòn semper lo tin un esfera trankil hasta ora tin hopi hende ta traha den e edifisio.

Ningun empleado no tin un ofisina propio tur hende ta sinta huntu den un espasio grandi habri pa asina tur hende por traha den un esfera trankil i dushi, loke ta stimulá alabes un mihó ambiente entre e kolegna nan un ku otro.

Otro sitionan ku ta stimulá e esfera di trabou ta e kushina grandi, e teras i e espasio sosial.

Tin espasio kaminda empleadonan  ta bini huntu pa kome, dal un beter òf kombersá un ratu den pouze. Tur kaminda bo tin e mesun gevoel dushi  meskos ku den e espasio sosial. 

Meskos ku dia a renobá e ofisina prinsipal di TUI na Rijswijk na 2018, aki tambe a sòru pa un espasio konfortabel  ku ta inspirá i invitá bo pa buska aserkamentu di koleganan pa huntu bosnan logra mihó resultado 

Ku esaki e edifisio nobo ta kuadra kompletamente ku e sistema di traha di TUI kaminda tur kos ta drei rònt di fleksibilidat. E intenshon di Tui ta pa Bo mes ta disidí na unda bo ke traha. Na kas, na ofisina òf tin biaha den eksterior.

Bo tin sosten di e sistema digital di “state òf the art” di manera ku unda ku bo ta fásilmente bo por tuma kontakto ku bo koleganan. TUI Way òf Working ta duna e empleadonan oportunidat pa nan traha di e forma ku nan ta kere ta kuadra mihó ku nan.