Tur dia ta topa famianan sin akseso na awa Personal di Aqualectra kitando awa i koriente debí na debe haltu

Punda,– Minister di SOAW, Ruthmilda Larmonie-Cecilia, a presentá ayera den sala di parlamento pa duna splikashon tokante awa komo un nesesidat básiko.

Un dje puntonan di enfoke di e gobernashon di minister Larmonie-Cecilia ta pa supsidiá uso di koriente i awa pa famianan di ménos rekurso. Segun e minister, te ku dia di awe su ministerio ta topando ku famianan ku ainda no tin akseso básiko na awa. Pa purba solushoná e problemanan, e minister a enkargá su ministerio pa duna oportunidat na famianan ku ménos rekurso pa registrá nan mes pa asina ministerio di SOAW por atendé ku e problemátika.

“Banda di esnan ku ya a registrá, ainda tin otronan ku ta aserká e ministerio ku e problema ku no tin akseso na awa”. E rason pakiko nan no tin akseso ta debí ku nan a krea un debe na Aqualectra, kaminda e kompania estatal a kita nan akseso pa risibí awa, minister Larmonie-Cecilia a splika den sala di parlamento. Sinembargo e grupo aki no tin posibilidat pa drenta un areglo di pago pa asina Aqualectra por habri nan awa bèk.  

SOAW mediante nan presupuesto a kuminsá finansiá pa klientenan sikiera drenta den un areglo di pago, pero mesora e minister a splika ku e situashon ta saliendo kompletamente for di man. SOAW ta risibí famianan ku tin debenan na alrededor di 20 mil te ku 148 mil florin. E montantenan haltu tambe ta debí ku e klientenan ta risibí un multa debí ku nan ta purba rekonektá e awa riba un forma ilegal.

E minister di asuntunan sosial a splika ku aktualmente tin diferente reunion ku Aqualectra pa asina e kompania estatal tene su ministerio na altura na momentu ku un kliente di SOAW no ta pagando su debe. Asina por aktua mas trempan, pero e minister a splika mesora ku ningun akshon konkreto tokante e plan nan aki no a kristalisá. 

Dado momentu e minister a splika ku riba término largu su ministerio ta trahando riba un maneho adekuá pa redusí e problemátika aki, pero tur esten ministerio di SOAW ta sigui ku e kampaña di informashon. Na momentu ku Larmonie-Cecilia tabata duna splikashon na diferente pregunta e minister a splika den parlamento ku un sistema di pagatino pa awa por ta un solushon adekuá pa eliminá e chèns ku klientenan ta krea un debe supstansial na e kompania estatal, Aqualectra.