Back to Top
Vigilante banner image

Tur sinku piskadó ku tabata detené na Venezuela ta liber


August 12, 2021 • 2 minüt pa lesa

For di ayera despues ku Gobièrnu Pisas a intermediá e piskadónan a wòrdu liberá.

Willemstad—  Despues di tabatin mas ku 1 aña sera na Venezuela, porfin e piskadónan a  bin rekobrá nan libertat.

For di ayera e sinku piskadónan ku a sali Kòrsou pa bai buska Piska na Islanan Aves a rekobrá nan libertat. Tabata en luna di aprel di aña 2020 ku e seis piskadónan aki repartí den dos boto a bai den direkshon di Islanan Aves pa buska piska. Segun e piskadónan nan tabatin sèn huntu ku nan pa asina por a paga e piskánan. Tabata warda kosta Venezolano ku a interseptá nan boto pa despues a detené tur e seis tripulantenan i tambe a kita tur sèn for di nan. For di e dia ei e odisea a kuminsá unda a kuminsá pidi plaka pa asina nan wòrdu liberá.  E piskadónan asta a manda mensahe pa mandatarionan aki na Kòrsou hasi tur posibel pa asina por haña nan libertat pero esaki tabata enbano. E trato den e prizon na Venezuela tabata asina pésimo unda nan tur mester a drumi den un sel chikí i mester a kumpra kuminda pa asina por a sobrebibí. For di fuentenan por a komprondé ku Minister Presidènt aktual den kaso di señor  Pisas a pone basta preshon riba Hulanda i tambe a buska su kontaktonan pa asina por a yega na e grato notisia ku a laga e sinku piskadónan liber. Mesora despues ku e komishon aya na Venezuela a haña enkargo di outoridatnan mas haltu a liberá e sinku piskadónan. Na e momento nan aki Gobièrnu lokal ta hasiendo e trámitenan mas lihé posibel pa e piskadónan aki yega bek Kòrsou. Asina e odisea di mas ku un aña a terminá.

Login