E kas na unda a drenta i a kita bida di e hòmber Marechaussee.

Willemstad— Ku detenshon di e último sospechoso djasabra mardugá na altura di un sentro nokturno riba Rooseveltweg por bisa ku tur sospechoso ku a partisipá aktivamente den e kaso di ladronisia ku morto riba e víktima Marechaussee Toon Brood den su kas na Reigerweg 53  ta paden esta detené i enkarselá.

Ta trata di un kaso ku sigur e tim di atrako  huntu ku yudansa di Marechaussee i tambe algun eksperto a traha ku alma i kurpa pa despues di sigur 15 dia por  bisa ku e kaso ta práktikamente solushoná despues di a logra di detené sigur e kuater sospechosonan ku a partisipá aktivamente den e kaso di ladronisia ku morto ku a tuma lugá dia 31 di mei último den Reigerweg na unda un hòmber Marechaussee a keda asesiná. Vigilante for di despues di e suseso lamentabel nunka no a duda den e tim di atrako i asta a trese esaki padilanti ku sigur e tim di atrako ku Kòrsou ta disponé di dje ta bai solushoná e kaso aki i e tim lo no bai sosegá miéntras ku esnan kulpabel ta tras di trali. No ta kita ku  e tim di atrako ku Kòrsou ta disponé di dje lo a haña yudansa di Marechaussee i tambe ekspertonan Hulandes pero esnan para mas dilanti pa hasi e investigashon ta e personal kapasitá di e tim di atrako. No mester kita mérito tampoko di komunidat ku a yuda grandemente pa asina por a solushoná e kaso lamentabel aki ku a laga un mama i un yu desampará despues ku partner i tata a sali for di nan Pais esta Hulanda pa bin yuda kombatí kriminalidat aki na Kòrsou. Tabata djabièrnè 31 di mei 2024 alrededor di 23.43’or, Sentral di Polis a risibí yamada ku na un adrès Reigerweg bisiñanan a tende un dama ta grita pa yudansa.

Mesora a dirigí un unidat polisial na e sitio.  Na su yegada, el a bin topa personal di ambulans tratando un víktima maskulino ku a risibí tiru for di un arma di kandela na altura di su pechu i tabata den un estado di prekupashon. Kontinuando ku e investigashon a bin sali na kla ku e hòmber aki tabata sinta ku su pareha den balkon patras di nan kas na momentu ku nan a tende un zonido. E hòmber a lanta bai wak ta kiko i djis un ratu despues e dama a tende un tiru. Mesora despues el a wòrdu sorprendé pa tres hòmber den kas di kua unu di nan ku kara tapá i ku hanskun bistí, a bini riba dje.

Bou di menasa ku arma di kandela e hòmber aki a obligá e dama habitante pa entrega sèn i yabi di outo. Despues di a buska rònt den e kas, e hòmbernan aki a bandoná e kas ku e outo di e víktima. un outo di famia di marka Chevorlet modèl Beat koló oraño numerá B/36-0 ku mas despues den dia a wòrdu hañá bandoná den e bario di Vetter.  Personal di ambulans a trata na reanimá e víktima, pero sin e resultado deseá. Na e kas mes algun ratu despues, dòkter di polis a konstatá morto di e hòmber Antonius Johannes Maria Hendrika Brood nase na Hulanda di 49 aña di edat. E mesun mardugá a hasi un kantidat di investigashon na e kas pa despues a regresá e djasabra mainta unda e tim Forensiko I tambe e tim di atrako a sigui ku e investigashon. A kuminsá studia tur grabashon di kámara ku tabatin den e bario i  tambe e aria unda a bin topa ku e vehíkulo hòrtá bandoná. A logra di haña un kantidat di imágennan ku tabata di vital importansha pa por a identifiká  i rekonosé e sospechosonan. Tabata aki nan ku a forma un tim speshal pa asina resolvé e kaso lamentabel aki mas lihé posibel. A sigui ku mas investigashon i tabata djabièrnè  7 di yüni 2024 entre 05.00’or i 10.00’or, a tuma lugá sinku (5) entrada hudisial den kuadro di investigashon den e kaso di atrako ku morto di e mareshosé, djabièrnè 31 di mei 2024.

E tim investigativo a bishitá dos adrès den área di Otrobanda, unu na Oost Jongbloed i dos otro kas na respektivamente Noord Zapateer i Rondeklip unda esnan envolví den e kaso lamentabel riba e Marechaussee ta biba  òf hospedá.  Durante di e entradanan hudisial aki a konfiská algun vehíkulo i artíkulonan ku ta di importansia pa e investigashon. For di na e entrada hudisial mama di un di e sospechosonan a primintí outoridat ku e lo laga su yu bin entrega manera ku e tin kontakto kuné. 

Promé detensho
Esaki a pone ku e mesun djabièrnè dia 7 di yüni 2024, e hòmber C.C.Nocento di 25 aña di edat nasé na Kòrsou a bai entregá su mes na warda di polis na Rio Canario. E hòmber aki ta e promé sospechoso ku a keda detené  den e kaso di atrako ku morto ku a tuma lugá den Reigerweg dia 31 di mei 2024. E sospechoso aki a bin atmití unda e la deklará ku a bai pa hòrtá den e kas di  víktima pero no tabata na altura ku aki ta trata di un miembro di Marechaussee I nunka e intenshon tabata pa kita su bida. Asta a keda deklará ku no ta promé biaha ku a bai hòrtá na e kas ya ku den pasado asta a logra di kue vehíkulo for di e adrès bai kuné entre nan un bròmer kual durante di e entradanan hudisial enbèrdat a keda konfiská den Bonam. Investigashon a kontinuá na unda a logra di detené un sospechoso pa e kaso di ladronisia di bròmer ku a tuma lugá dia 6 di mei na Reigerweg. E sospechoso tambe a deklará ku tabata un konfrontashon ku e víktima esta e hòmber Marechaussee den su kas unda e la trata di kue esun ku e arma tene I bala a sali. E dia ei a logra di bai ku algu di sèn I e vehíkulo pero a bai laga esaki atras den Vetter pa despues a sigui mas lat pa un sentro nokturno den Saliña.

Di dos detenshon
E di dos detenshon a ser ehekutá den Brionweg na unda a detené e sospechoso Fraai. Tabata djadumingu 9 di yüni 2024 alrededor di 01.23’or, Tim di Aresto a tene un entrada hudisial na un kas den Brionweg.

Durante di e entrada hudisial aki, polis a detené e hòmber A.H.F. di 19 aña di edat nasé na Kòrsou pa e kaso di asesinato ku a tuma lugá dia 23 sèptèmber di aña pasa unda e víktima Tahyr Jansen a keda asesiná.  A konfiská na e mesun adrès dos arma di kandela i munishon. Fraai ya tabata wòrdu buska pa e kaso di asesinato di aña pasa pero tambe a bira sospechoso den e kaso di ladronisia ku morto den Reigerweg. Esaki kier mes ku awor Fraai tin dos akusashon basta serio den su kontra.

Di tres detenshon
E preshon di e tim di atrako a pone ku e di tres sospechoso no por a wanta mas i e mes a presentá na warda manera e promé sospechoso I a entrega su mes. Tabata djárason dia 12 di yüni 2024 alrededor di 22.30’or, e hòmber A.J.Martina alias Pra  di 22 aña di edat nasé na Kòrsou a bin entregá su mes na warda di reshèrshi. E hòmber aki tambe ta sospechoso den e kaso di atrako ku morto ku a tuma lugá den Reigerweg dia 31 di mei 2024.

Di kuater detenshon
Djasabra 15 di yüni 2024, polis a hasi detenshon di  e di kuater  sospechoso  den e kaso di atrako  ku morto na Reigerweg dia 31 di mei último. Alrededor di 01.15’or, e Tim di Aresto a detené e hòmber G.H.Zimmerman  di 26 aña di edat nasé na Kòrsou, riba F.D. Rooseveltweg na altura di un restorant.

Despues di su detenshon, a tene un entrada hudisial na un adrès den Kaya Tamburero i a konfiská artíkulonan importante pa e investigashon.  Ku detenshon di e kuater sospechosonan aki e investigashon kaso ladronisia ku morto riba e Marechaussee ta práktikamente solushoná. Ta bisa práktikamente ya ku ainda falta algun detaye chikí ku mester wòrdu investigá pero engrande rasgo e kaso ta solushoná. Sigur un bon trabou realisá pa e tim di atrako.